رسالة إلى مجهول
يا خـويـا ورّاك غير ارجـع للدار واه انهون اعليك هكذا تنسـانـا
أمّك دمعة عينيها حرقت لشفـار و الوالد مسكـين عينو سـهرانه
خلّيت الحـاره و لوليدات اصغـار و الزوجة ف الدار عنـك حيرانـه
هـاذي مده طايله ماهوش انهـار مقواها تبكيك و احنــا مقوانـا
قعـدت شجره يابسه من دون اثمار مقطوعة لغْصان قعـدت عـريانه
يسقسو فيها أولادها عن كاش أخبار لميمه ويكتاه يرجـع بابـانــا
اتحطـم قلبي من غيابك شعلت نـار اتشوقت اتجي و نحضن بعـضانا
نبكي بكـي النوح علّلي فينا صار بعد الفرقه جات ساعة ليقـانــا
رانا سـامحناك مقبـولـه لعـذار يا خويـا مازال عنـدك مكانـه
يكفيـنا تخريب يـكفـينا دمـار يكفـينا تـقتـيل و ارواح معانـا
لا تـبقى مغرور لا تبقى نـكّـار لا تقعـد معزول بعدك عيـانـا
ماهنتش كيفاه ترقد غي في غار و الله ما نشتيك تبقى في الهـانــه
راه العالم قاع عادلنـا حقـار و العـربي صديقنـا راه اجفـانـا
ريح الفتنه صابنـا سبّب لضـرار ما نعرف كيفـاه ذا الـواد ادّانـا
اتغـرينا قاع شعّلـنا ذ الـنـار صار الوطن اكفـان و احنا جـبّانه
راه استفتى شعبنا و اخـذا قـرار فاتوا عشر اسنين قلنا بركـانـا
هاذي أرض اجدادنا أم الأحـرار الجزائـر ما اتهـونش غضبـانـه
غير اهبط و ارواح تزهى بيك الدار يا خويا و علاه نهجـر بعضانـا
لا حقد لا غش لاحقـره لا ثـار عندي ثيقـه فيـك مولى ديـانه
يوسف سامح خاوتو رغم للّي صار التسامح قال عنّــو مولانــا
عارعلينا مـانكـونش ناس اشرار عار اعلينـا ما نهدّم سكنانـــا
عيب علينا بلادنـا هكذا تنهـار عيب اعليـنا انخون هاذا الأمـانه
عـدنا للوئـام عدنا للـحـوار فوضنا ريجال علم و فطــانـه
البر اللي كان خالـي راه اعمـار و الأرياف ازهات عـادت مليانه
والجنان للي كان يابس راه اخضار و الطيور على اغصـانو فرحـانه
شعبك يخدم ف الفلاحة نح اثـمار و اتصالحنا كلنـا كيـما رانـا
وطنك صافي كي الذهب عند العيّار فيه المتعه و المناظــر فـتّـانـه
في يوم انلقاك نهديلــك نــوّار البارود امع ازغـارد رنــانـه
راك اتجي و اتشوف لا طالت لعمار فاقت قاع النـاس و الرب اهدانا
رحمة ربي واسـعه عمّت لقطـار قبّال التوبــات سامع دعــانا
أستر حال بـلادنـا و انت ستّار ارزق الحيين و ارحم مــوتانا
بجاه القـرآن بـجاه المختـار فرّج يا ربي و سدّد خطـــانا
عين الحجل 03/05/2005
لفراق المحتوم
يا سايلني على اماّ ماذا خــلات كي رحلت خلات كانوني طافي
سهلي يا خـالقي في ذ الكلمات ما نسعى من غي اسلاح القوافي
كنت اصغير ولا دريتش بالشوفات نحسبها من غير عيطـه خفافي
طارت عنا كي لحمامه وتْعـلات العش اتفرقع ف اسما راح اشقافي
كانتلي عساستي في وقت انْفات كانت ليا مكحـله فوق اكتافي
اتهدم سقف ابّيتي ضرك اتـعرّات هبت عنها ارياح ملـيانه سافي
بر الله اظلام عني و اتمـــسات لسعه شينه حار فيها وصّــافي
اصغير و ماني مْوالف بالفجـعات ذيك الليله تْبدلت قاع اوصـافي
اتهلوست نبات نسمع في لصوات نفطن فازع غي امّا بين اشفـافي
يهدفلي خيالها بين الدرجـات نتلفت ضنيتها جــات اردافي
نتفكر و انديرها غي ع الدمعات نتنهت مجروح بالـموس الحافي
الحياة بلا امّا ماكان احــيات هي نبع الروح و الحـضن الدافي
محمي بين احضانها كل الأوقـات نتْحبْنن فرحان شبعــان و دافي
و من جاني للبيت نلقاها هنّات و اتشرفني دايما بين اضــيافي
من فرقتها زادت همومي و اقوات اقصف ثوب نْكان في ستري وافي
من الصدمه تقول شمس الكون اطفات كسرلي لفراق ظهري و اطـرافي
قعدت انصبر ف الذراري والبنات اصغـير و مازالني راني شـافي
يبكي بويا قال بيتي راح افتـات واش يْداوي فْـراق زينة لوصافي
كانت ليا شمعتي وسط الظلمات و كانت في بحر لمَحاين مجـدافي
اتربينا كي لعشب في شاو انْبات نخلتين على رمــال الفيـافي
ياحسراه على امـك ماذا قسات اتْنقريشي حــاملاتو و اهرافي
كانت ليا طبيبتي وقت الشدات بكلمه منها كل لجـراح اتعافي
و ما ترفعشي صوتها عني هيهات تهمسلي من غير بالصوت الخافي
ما نلقــاش امثيلها ف المخلوقات عشرة عمري قاريه كل احرافي
جيل الحشمه و الحيا جيل الخصلات الراي المعدول و العهـد الوافي
ما ننساكش في اصلاتي بالدعوات درت غير الخيـر و اعلاه اتخافي
الفرقه لابد و الرحلـــه دالات لفراق المحتــوم سنة لسـلافي
يا ما شفنا من المصـايب و المحنات و الحمـد لله حققت اهـدافي
كفكف دمعك يابني يكفي تنهات يا سعد للي راح للمـولى صافي
ابكي علّلي حي ميش على لّلي مات و نّوح علّلي عاصية و للي جافي
كم من وحده مالقاتش وين اتبات ماذا من محروم من القوت الكافي
في ذ الوقت الشين لوجوه اتعرات و اتخلط فيها الكـرفـه بالصافي
إلي طايع ما يْخـافش من العثرات و للي عاصي ما يْشافيه الشـافي
من بعد ثلاثين سنة مـن الوفــاة اتفكرتك يا مّا جـبت احرافي
رانى ندعي دايمًا في كـل صـلاة خيرك سـابق يا مّا باه انكافي
قدر عنك خالقي ليام افنــات و ماكنتيشي حـاضرة في زفافي
ارحم يا ربي الأم للي ربــات جازيها و اعفـو عليها يا عافي
يا من تسمع قولنا في ذ الأبيـات خلّي قلب اميمتك عنك صافي
ألف صلاة عْلى شفيع المخلوقات يوم تْكون الناس عـراة احْوافي
12/07/ 2009
رسالة الى اخي
خويا ليـه سنين راه امقاطعني عندو مده مـا يقربعشي ف الباب
لو يجيني كاش واحـد يسالني قولـولي واش دو نقلو يا لحـباب
ما شكيتش فيه رايح يعذرنـي نتبهدل ونعـود في ظـنّو كذاب
يتعجب كيفاه خويا يهجرنـي بلده وحده و نسكنو لثنين اقـراب
خصله شينه ما اتوالمش لديـني و انهـانا ربي عليـها ف الكتـاب
أمه كبيره كي احنايا يا غبنـي فـان الدنيـا ردها كامل عيـّاب
ياخويا وعلاه راك معاديــني المفروض اتكـون واحد م لصحاب
نا راني ظنيت فيك منايفنــي ماذا بـيا اتجي توضح لي لسبـاب
و اتفهمني لاه غي جابد مـني عيّط لي نتحاسبـو قبل الحسـاب
فـان الدنيـا ما يعلي ما يبني و يجي يوم نروح ب القصبة هُراب
ويذا بيك الورث خويا حاسبني شـرع الله بيناتنا و الحـق اصواب
الرّب للّي يحرمـك و لا يغني باب الله ما عليـه يا خـويا بّواب
ما تحشمش ارواح ليا صارحني اخّيك ماهوش قاطـع لا نصّاب
راني خفت الموت عنك يخطفني و نخليك يفوت عمرك طول عذاب
وانتفرها فيك قبل ان تخدعنـي تبقى عايش دايماً عْـلى لعصـاب
يا حناني غي ارواح تفكرنـي جرحت قليبي راه مدقوق بنشّـاب
راني نحشم كي تجي عاقب عني نتوحوح كيما للي صابوه اعطاب
اليْكتْ و انت غريب مهاجرني ضحكت عنا ناسنا شايب و شباب
ياخويا خلّي وليدك يعرفنــي و ما تامنشي دهرنا هذا كـذاب
كم من واحد كان زاهي و يغني دارت عنو الدايره و ارجع طلاب وكذا من لي مات ماهوش مهني نايف خوه على قْطار انتاع تراب
قداه ان مـره نجي و ترجعنـي نجّيه و ابعثتلـك حتى لنسـاب
ماكش يا خويا بعيد على عيني انصبر روحي نعذرك عن ذ الغياب
درت الكنّه و مزال راك مخاصمني عيب علينا ميش من صيفــة لعراب
من قبل ايلا يموت بابا وصّانـي خيّك خيّك ما يقروكش لصحـاب
ياحســراه منين كنت امونسني انباتو نجرو هاملين مع لعــــلاب
نشفـالك و انت اصغير تساميني نرقدو في فراش واحد يا هـــراب
النمامـه انظن عنك بعــدوني كاين ياسر م لعرب موذي غتـّـاب
راهم عشره يهدمو وآخر يبنـي ياك الجاهل خدمتو غير التريــاب
حتى نايا كي انتايا جرحونـي نعت الذيابه مكشرين على لنيــاب
الدنيا فيها الخيّر و الدونـــي أمه كبيره همها غير التثـــــقاب
يا راجـل قداه عرضـه فاتتنـي خوك كبير و ديرني في عـوض الآب
نترجـاك اذا اغلطت تسـامحني خيار الخلق للي اغلط و ارجع و تاب
استغفـر مولاك و ارواح احضني ضركه واش ابقانا رانا شيـــاب
ماذا بيا نشاورك و تعاونـــي و اتخفف عني شويـه م لتعـاب
تسعدني زيارتك وتْفـرحنـــي كانْ نصيب ندير خويا في لهداب
جيب الذراري كاملـين و زوروني نطوو صفحه من لمحاين والعذاب
عبره ليهم كي اتجي و اتقابلنــي نغرسها في اولادنا حسن الاداب
كاين ياسركي احـنايا يا غبنــي فــان الدنيا ردها كامل عيّاب
من صيلة لرحـام مانيش امهــني نحس الأمه تشتت و الحال اصعاب
فرّج يـاربي على كامـل وطنـي وافتح عنا يا عزيز و ياوهــاب
12/13/07/2009
العـاق
تـراكم هم كبير ع الـبر و عمم تسمـع مغريبات واخـرى تراها
تبـقى من بـعض لَقْصايص تتألمْ تحلف جـازم ما تصدّق مولاهـا
ما تخطرش خْلاص عـن بال المسلمْ لو تبحــث تاريخـنا ما تلقاها
ماهي قصة جن خـارج من قمقم ما تشبه أفـلام خلعه شفنـاها
هاذي قـصه صايره في واحد الأمْ قصه شـاعت واقعه و اسمعـناها
هلكتني خلات قلبي يتقسـّــمْ شعلت ناري ف لفريسه واعضاها
كي وصلتني بديت في قولي ننظمْ نختصر ف لْقَول نشرح فحواهـا
عجوز كبيره شافها راعي لغنــمْ لاح بعينو شاف غبّار احذاهــا
طرف الغابه حطها واحد و ابـرّمْ لا تلفاتـه صد عنها ..خلاهـا
راح الحال و بـاقيه تستنـى ثـمْ و حين استطولها الراعي ناداهـا
إستـأذن منـها وجـاها مـتقدمْ و توقـف منها قريـب و حياها
حـيرتيني قالـها شـاهي نفهـمْ هاذ القعده ما فهمتـش معنـاها
وش لاحك يا ميمتي في ذا المقسم عيدي عني حكايتك من مبداها
امع الصبحه حطني ولدي واعـزمْ كاش ما تفكر صالحه راح اقضاها
ناضت تدعي نشاء الله ولدي يسلمْ حارت و استـنات طوّل ماجاها
كون امهنـي قاتلو لاه تخمــمْ ما شكتش خلاص بنهـا ينساها
الـراعي فطيـن يعرف و معلـمْ أكسب معلومات منها سقساها
واشي هي نكوتك واش الإسـمْ واش من عرش وين هيا سكناها
كبيرة سن معديه ياسر من هـمْ شيبـها طول الزمـان و عياها
اتمسات بدات لجواو اتغيّــمْ راح الحال وحار كي يدير معاها
في ذ الغابـه غي الذيابه تتلايمْ حان الوقـت للى تغادر مأواها
ما هناهش خاطرو وبقـى هايمْ حذرها كي عـاد رايح وصاها
هنى نفسو كي اعرضها و اتكـرّمْ و لما رفضت سـاق غنموا و داّها
بايـت طول الليل دايس و يخمم و يحبر.. كيفـــاه غدوه يلقاها
و مع الصبحة جا المسكين يهوّمْ يتفقد ف للي البـــارح خلاها
في ظنـو بلاك عـادت للمرسـمْ ولّ بنهـا رجـع ليهـا و اداها
لما وصل وْجـد بقعات مـن الدمْ القى فْريسه ناصله من بعضاهـا
جسم مقسم ما بقى واش فيه تلم و القـى كتانـات من حوالاها
وسط امراقه كانهم صوف مبـشّمْ اذيابه و كلاب لعبت ب عضـاها
المشهد خـلاه مجـروح محطـمْ عاد يقول لوكان غي بت معاهـا
عاد مـندم عاد ع النفس يلـوّمْ متنـوي و عــلاه راح وخلاها
من الصدمه ظن في نفسو يحلـمْ عاد يكلـم ف لبهـايم دوّاها
اتشجع و راح خبّـر ع الظالـمْ جاب الدرك وجاي عارف مولاها
دارولو ع الباب قبضوه المجـرمْ كشـفو ربي بين عشوه و ضحاها
كي سالوه الأمن ولّ يتلعـثــمْ هدرة خاين داخله في بعضاها
غرّت بيـه شريكتو قـمّر بـالامْ قدمها قربان للـذيـب اكلاها
تلوث دمو من المـناكر ولّ سمْ هانت عنو امَيْمتو راح رماهـا
قاع الحاره اتزعزعت من ذ المأتـم غيم حزن كبير عنهـا غطـاها
هذا الراعي دار مسكين الــلازمْ غـاشي ياسر من لخلايق بكاها
الكافر من هول ذا صّدمه يحشـمْ انّصراني ل مَيْمـتو ما يرضاها
اتمنيت نْكـونـلو قاضـي نحكمْ شمس الدنيا ما يزيـدش يراهـا
و اللهِ ما انْحـن عـنّو ما نرحـمْ يقعد عبره للخلايق تــقراها
بعد عنّا يالله كـي هذا الهـــمْ و اكرمنا بشفاعـة النبي طاها
تراكـم هـم كبير ع البر و عمّمْ تسمع مغريبات و أخرى تراها
أكتوبر2006
مشردون
حيرني مخلـوق شفتو يتمــرمد يتسكع بين الشـوارع يتـلاوح
كي ناديتو ما انظر فيا مــا رد اعرفتو مسكين من الدنيا رايـح
غي يتـرامى وين نفحتلو يرقد مْعدي وقتو هكْذا قدرو طايح
تايه عقلو مـا لقى لا وين يصد غارس وسط الطين يمشى يتمايح
اعواصف وارياح من لارض ترفد يا مطول ليل الشتا بردو كاسح
من ذ البرد تقـول نلقاه امجمـد اجليد يْقَطع و المطر عنو سايح
اتسبح لله مـولاك اتوحــد لما تشوفو يبانلك هـاني رايح
ايجى فصل الصيف نيرانو تصهـد وقْت ن تيبس فيه خضره و فْلايح
في ذ الجـو تشوف صاحبنا يقعد متوسد رصيف للشمس و طايح
عايش في ذا الحال عنـو متعود افراش الكارطون و الخبز الصابح
ماهو داري ب لبلا ما يعرف حد تتقـارت صبيان خلفو و تْلاوح
تختلـف انـواع في ذ المشـرد كل واحد كيفاه في عالم سابـح
واحد يمشي مع الشوارع و يْهـدد واحد فيه الخير عاقل و يْسامـح
هذا صامـت ما يكلم حتى حـد هذا يحكى مع الأمه و يْصافــح
نوع آخر تلقـاه غـاضب متشدد تقرا فيه الموت بالخط الواضــح
هاز المطرق وين والاه يســدد من يستهزا بيه ظينتو جايــح
يتحول تمسـاح ف لمشية يمـرد يتختل للصايده بيها فـــارح
تشوف الخنجر رافعو يلمع ف لييد يعرف يسلخ بيه من قبل و ذابـح
كم من واحد مـات من ذ المشرد هاذا الفيئه تدير بزاف اصوالــح
نوع آخر تلقاه يصحى يتعقــد ما تفرز مجنون منو من صالــح
رسام وفنـان يقرا و يجـــود و يوري طرقان و يمد انصايــح
ريجـال و نسوان لا تحصى عدد افرايس دون عقـول راها تتلاوح
فيئـه غطست ف لمحاين تتمـرمد اغنم بلا راعي اخوات و تضابـح
هذا من التخـذير مسكين اتقرمد باع العمر شراه كاشي و اصفايح
واش ابقالو راح عقلو و اتثـرود ولّ نعت ابهيم ف لوطيه سـارح
شاب صغير اعواج جسمو وتكدد من التخذير تموت قاع الجـوارح
هاذي تبكي على صغرها و اتعدد هاذي هربت خايفه من لفضايح
هذا شيخ كبير جسمو يتـراعد هاذى عجوزه فايته عمر القارح
راب غصنها ما لقات عْضاد تشد شجره خرفت والورق منها طايح
راح القد الزين و الوجه اتجعـد راح الزين بْقات غير الملامــح
خان الدهر و دار لَبَسْهم لسود و الدهر إذا دار بانيابو جـارح
الأخلاق تْزلزلت و الحب اتهـد الوقت اتعفن عاد فايح بروايـح
اتكشفنا ما لقينا واش نجحــد يا حسراه عليك ياوقت البـارح
تبقى حايـر وين أمـة محمـد وين أصحاب الخير و الفعل الصالح
واحد عـايش في غبينه يتمرمد لاخر بين قْصور تلمع و امطارح
يا سبحـانك يا لواحد الصمد في خلقك شؤون ياسر و اصوالح
افتـح يا ربى عْـلى ذا لمشرد يا عــالم لغـيوب بيدك لمفاتح
يربح من صلّـى على طه لمجد مول الخير يعيش ف الدنيا فالـح
أكتوبر 2006
حلم بالانجاب
بونـادم بكاي شكـاي ويضبح معـروفين اطبايعو ديمـا وحـواح
إذا مسو خيــر بونادم يفرح و إيـذا مسـو غير لوّام وصحصاح
الوحده صعبه و وقتنا هذا يفضح و الوحداني دايمــا مكسور اجناح
لا لـي ورده فـي جْناني تتفتح و ما هو بيدي نغرسك يا ورد اشباح
ماكش لا تتباع في سوق انبرح نشـريك انهني قلبـي من لجـراح
بين حْيوط البيت راني نتوحوح نستنى في ضيف ما جــاني ما راح
ساهر طول الليل نبنـي ونطيح ونقــابل ويكتاه تشعل يا مصباح
الدار بلا بيك ما فيـها يصلح و بـلا انتايا يا بْني خــالي لمراح
كل شهر نقـول بـابي يتفتح ضـاع العمر ومالقيتك يا مفتاح
اصبرت حتّان راه الكيل اطفح و ما فرطتش يا بني ما ني مشحـاح
عندي غير الشعر نسبح كي تنفح رانـي داير يا بني من الشعر اسلاح
هايـم في ذا الواد راني نتفسح و نستنشـق منو العطر للـي فواح
نشرح فيه هموم قلبي و انشرّح وانفاجي عن خـاطري علّ يرتاح
ناري تزهر في عضايا واتفحفح فايض دمعي كـي البركان إذا ساح
من شوقك راها الكبده تتمحمح ونحلم في نومي نعيطــلك أرواح
تجيني تجري كي القمري و اتيتح و انروق خيتوستي نعطيـك جْناح
أنريح كي تعـود عني تتجيـح و تْـريش بيـدتيـك ليا لـواح
ناوي يا ولدي نشبحلك مطرح ندير فراش حرير ننقشلو للـواح
كلمـة بـابا تقولهالي و انريح و اتـرددها يابني عشوه و اصباح
بيها يهني خاطري بيها نفـرح و بيها يهبي ضرنا تطفى لجــراح
أتمنيت اتجـي نقريـك وتنجح و اتمنيت ندير لوليدي لفــراح
و الحنانه مَيمتـك غير اتويدح قالت قلبي راه مدقوق ب لرمـاح
راها تمشي كي لحمامه تتدلوح بيهـا شوقك ع الجمر قالت نتلاح
وتفتش على طريقـك و اتبـرح سقسات الأمي وسقسات المـداح
ولعقاقر مالـيه منــها لقـدح اتبخر و تزور تدعي في الصـلاح
بيها تسمع ف لكلام للي يجـرح الممنوعه جــربت و للي تتباح
انصبـر فيها وفي نفسي ننصـح و نْخفف عنها ليالـي بالتمـزاح
نستغفــر و نعود لله وانسبـح متيقن عنـدو الباب مع المفتـاح
إدعيتـو يـا رب لعل يفتـح و ليـالي صليت باكي بالتنـواح
عـارف ما ينفع فيها غير الصح وكل ادموعي لقيتها من غير جياح
مهما طال الحال لا بد انـروح تبقى غيـر أنت يا نـاشي لرواح
بيدك يـا ربي تدير للي تصلح وتشتت ضرى يـروح مع لرياح
اجميع للي شد في حبلك يفلح تتسقـم و تعودلـو ليام املاح
من حبه يجني قنـاطر و يفلـّح و مـن ورده يبني جنينه للسياح
تتحقق و تعود كل أحلامو صح كلمة كن يكون في رمشة للماح
ياسر خلق الله تبكـي واتنـوح و ياسر خلق الله مكسورين اجناح
ابـن آدم بكاي شكاي و يضبح و معـروفين طبايعو ديما وحـواح
ماي 2007
حراقه
مدخل:
جيتك شاقي يا بحر قلت انسقسيك مـاني جاي انـعـوم و لا نتفسح
موالف تنفح في زمان الصيف انجيك نسـتجمم على اشطوطك و انـريح
جيتك شاكي قوم تاهت بين يديك ناس بلا ضمير في عمقـك تسـرح
لكن عـذراً يا بحر لا لوم علـيك اللـوم عْلى ناس فـي ظلمه تسبـح
القصيدة:
رد علـيا يا بحر كيـفاه اندير مـن الحـراڤه راه ڤلـبي يـتقسم
لالي حيله كان صبت اجناخ انطير بـاه انـرجع ناس وطنـي للـمرسم
راه امشلوش خاطري مانيش بخير حال النـيف و هكـذا حـال المرحم
حاير نسال ويـنهم ناس التدبير ننصح هـاذا النـاس لعـلّ تحــشم
يا مڤـواني خاوتي عنـهم و انحير غاضوني واعـدادهم غـي تتــراكم
غاشي طاير كى سْراب العصافير مـن شتـى لعمار أمـه تـتزاحـم
لعبت بيهم ناس معدومـة ضمير اشراو الموت و عربنوهـا بعــمرهم
اتغـرو ظـنو الحرڤـه فيها خير الجـنه فـي بـالهم مـوجوده ثـم
واحد قال انروح و للي صار يصير نحلف بـاليـمين مـاعدتش نعـزم
و واحد مللي راح مجهول المصير اتحول كــابـوس حلمـو و تحطم
لاخر جثه هامده فـي شط تسير تتقـاذف لمواج بيـها تــتــلاطم
لاحتها وين الرمل لاح اقـناطير تحت الرمله تصـيب هيكل بونـادم
وغـاشي ياسر مالقـينالو تاثير بين أنياب الحوت لحمـو يتڤـاسم
هذا اللغـز اصعب عنا للتـفسيـر خلـّص بـاه يموت مسكـين ادراهم
تاهت خـلق الله فيك يابحر كثير و اتعجب فينا الكافر و الــمسلـم
خليـني نبكي على خويا وانحير نحزن طـول الـدهـر عنـو نتألم
هـوًن عمرو غـاب عقلو و التدبير و اركب في ظهر الفلوكه و استسلم
مـاشاور مـاقال تبقاو علـى خير سافر خفيه دون ناسـو ما تعــلم
تتـعجب و تحير تعجز ع التفكير الموت يْنادي و خويا مـتقــدم
مثـل الأعمى حاكم الظلمه و يسير تايه بـين أمواج و عْواصف تهدم
يا مطول مـوج البحر للعين اتحـير و ما تدريها واش مـن ساعه تهجم
يا خـويا مازالك ف لعـمر اصغير كنت مهني بـين أهلك تتـنعـم
واش لاحك يا وعيل بين الأعـاصير و واش جابك يا فار لليث تـقـاوم
راني خفت عليك تتصبح أسـيـر بـين الغـربه و بين كفره لا ترحم
حبـل الحرڤه يابـني ڤاسي وقصير خيطو راشي ما يطولش و يهـشـم
على التهلوكه نهاك مولاك الـقدير تتحاسب عن قتل نفسك يا واهم
انت و للي هربك ذاك الشريــر ذيابه تـنهش فـي عظام بني أدم
فتشت و مـالقيتلك خـويا تبرير فـي كل الحالات سـميتك ظالم
مڤـواهم حراسنا فـي بحر كبـير تحيه لرجال سهـرانـه تـخــدم
نـقذو أمـه هابطه في قـاع البير فـئه محكومـه و فئـه تـتحاكـم
نتـعاون و نـدير حمله للتطهير ننـقذ هـاذ النـاس من موت امحتم
ويـن العلمـاء ويـن أهل التعبير كل واحد كيفاه و انديـر الـلازم
مانسكت مايروح هاذا الجيل يطير تبقـى فيـها غـى خديجه و العارم
انفضل عيش لوطن و لـو فقـير خيـر مـا نسـاق كيــما لبهايم
وكر اجدادي ما نبدل بـيه الغير حبو يـجري في عروقي مجرى الـدم
زوالي وافحل وطني خيــر و خير و غيـر على كرامتي مـانـسـاوم
أرض المعجزات فـيها خـير كثير أرض جـدادي مْغـيره قاع العالم
لا روما لا اسبانيا مزغنــه خـير و الله يـا لوكـان نطلب و انلايم
نزرع ڤمحي عْلى الثرى ونزيد شعير أرضي خصبه صحيح للغرس اتـوالم
لو تنطق تقـول لينا عيب كبــير خليتـونـي بور مڤوانـي نحطـم
بنت بـلادى غالية و عليك نغير و من غيرك ياحبيـبتي نـبقى صايم
نبنيلك لـوكان قـربي بـالقصدير مهرك حبي و من الـوفا هاكي خاتم
بنت الكفره مـا يجيني منها خـير بنت العم للى معاها نتـفاهـــم
غـير فراق خديجتي موحال يصـير و الله ما تبكي عيـونك يـاعـارم
عيـيت انخاطب في بحر ماباش يثير خلاني مـن غير وحدي نتـكلم
قلت نصبر ومن غير صبري واش أندير هكذا ربـي قـدر عليا و احكـم بعد العسر يجيب ساعات الـتيسير امغيـر لحـوال سبحان الدايــم
و يفرج عـنا السمـيع الـبصير تتـسڤم ليام لــينا تــتبسم
ادزاير أمي ما نبدل بـيك الـغير و غير على كرامـتي ما نـسـاوم
وبـالصلاة عْلى انبي طه البـشير محمد شفيعـنا قــولـي نحـتم
أكتوبر 2007
اتمسى قمري
على غفلـة نلقى الغاشي مـتلايم جموع كثيره واقفه قـدام الباب
ريت أبي مبطـوخ ظنيـتو نايـم نلقى الناس مخلطه شايب و شباب
يا سامعني نحـس بالجسم تهشـم نحس بثقل كبير راب على لجناب
ولّى صهـد الـنارفـي قلبي ينهم مْن الحرقه حسيت كلش فيا ذاب
تمسى قمري اترك جـوي متغيّـم خلّى عيني ماطره من غير سحاب
واقف وسط الـناس دايس و نخمم و العزايه كالطيور سراب سراب
ولّ ذوق الماكلـه طعـم العلقم غاب النوم على عيوني دار حجاب
ماهـو أمر عْباد نشكـي ونلـوّم حكمة ربي خالقي و الأجل كتاب
الكـل نـذوق الموت عنا متحتّم و لو كنا ف لقصور مع لقبـاب
بـاقي غير الله فـي ملكو دايم خلايـق ربي كامله ترجع تراب
حين يحين الموت واحـد ما يسلم و ما ينفعشي لا طبيب ولا عشاب
سنـة ربـي دارها لعمار اتـّم موت فريده غير مفروقه لسبـاب
خلاني نعت الضرير للي يهـوم خلاني وسط الوعر مـع لدراب
كان جياحي حاملو عيبي يكتـم ومشاركني ف المحاين كي لصحاب
إذا احتجت نلقاه هو للي يغرم و يفاجي عني همومي كي تصعاب
يصرف عني في غيابي يتكــرم و مع جيبـو ما يدير أبي لحساب
كان امزهيني و بـيا يتنعـم كنت زاهي بيه في عرشي نتهاب
صــد و خلّ كل بنيي متهدّم السُّور للي كان شامخ صار تراب
خلاني وسـط المحايـن نـتألم كان غطايا كي الزرب على لجناب
كان سلاحي كنت بيها متحزم ضركي ضرى وين نلقالـو طباب
نشفى بويا كان لضيافو يكرم كلمة أهلا ماليه فمـو ترحـاب
يشكرني وسـط الجمايع يتكلم و يْصَلَحْلي غلطتي و يقول صواب
واش بقالي ذرك في هـذ المرسم واش بقالي من احبابـي بعد الآب
عاد الهم على اكتافـي متراكم نتنهت يا خاوتي كثرو لتعــاب
راني مثل طير مجـروح معـدّم مكسور الجنحين طايح في زرداب
صعيب فراق ابُّي ما طقت انجّم و بلا هو عيشتي صارت تصعاب
كان محرم راحتو عنـي يخدم يا ما قاسى م المحاين طاب طيـاب
يسوق في البيت هو للي يحكم حتى زواجي هو للي خير لنسـاب
دعوة خير أديتـها مـنو نغنم يا سعد للي طاعهم عيشو يطياب
يا عاصيهم راه بنيانك يهدم حين الشده راك تبقى دون أحباب
احمد ربي راك في دينك مسلم و تْوسل لخالقك و اقرا لكتــاب
لا تنهر لا تقول أف و لا تشتم لا تبخلـهم لا تذوقـهم لعذاب
برضاهم تعيش ف الدنيا ناعم دعوه منهم نافعه تشفى لعطـاب
يا بن عمي كون فاهم لا تندم راه دعاهم كي تعود علـى لعقاب
وللي جاب القول جرب و اتيتم دبوسي ذاق المحاين راسـو شاب
احجيله هـي السكنه و المرسم و لمسيله ولايتـي جملـت لحباب
وبالصلاة على انبي قولـي نختم يشفـع فينا يوم ما ينفعش عتـاب
25/11/2004
نار الغربة
نار الغربه هوضت جـرح الكبـده ونار فراقك يَا بّـيْ حرقـت لعصاب
طال غيابـك طـال عنَّا ذي مـدَّه وتوحشنا يَا بـّـيْ و الحال اصعـاب
من غيرك نحس بالدنـيا ســوده النهار امظلم يَا بّـيْ غطاه ضْبــاب
ما ظنّيـنا تـروح عنَّــا بالزهده و ما ظنَّيـنا يَا بـّيْ تنسـى لحبـاب
ما ظنِّينا يَا بـّـيْ عـنَّا تـردى ما سقسيتـش يَا بّيْ ما بعثت اجواب
أقسى قلبك يَا بـّيْ عنَّا صـدَّا ولَّ أنت بدلتـنا و لقيـت اصحـاب
أنت حي و احنا نعيشو في وحده اتيتَّمْنا يَا بـّـيْ مـن غير أسبــاب
بر الله ميسوع و احنا فـي شدَّه اتمنَّيْنا تكـون واقـف فـي لجنـاب
رانا عرضـه كاش واحد يتعدَّى الدنـيا غابه يَا بـّـيْ حاطت بذياب
كلشي سامط عندنا في ذا البلده الجو مغيَّم دايما كي ضـوَّك غـاب
ما يحلاش يَا بـّيْ عسل الشهده الماء كاين يَا بـّـيْ و احنا قــُوَّاب
لا كسوه لا عرس ينفح لا زرده النَّاس اتعـرَّس يَا بـّيْ و احنا عـُزَّاب
جدِّي مات و زاد لحقاتو جـدَّه اتْهدَّم بنيك يَا بـّـيْ و اسقفنـا راب
بيبان الحنـان عـنا متســدَّه رانا قعدنـا يَا بـّـيْ دار بلا بـاب
نْساعد في خاوتـي وحده وحده نْصبَّر فيهم يَا بـّـيْ عنهم كـذاب
إذا مرضـو نهزهـم للعيــاده و راني راني كي أمَّا عنــهم ربراب
كي يلحق العيـد نشـري عَيَّادَه سـاهر عنهم يَا بـّـيْ ليلي رقـَّاب
والعيد بلا بيـك فرحـة محدوده و انت تعرف يَا بـّـيْ معنـاة الأب
أمَّا راهــا للمحايـن تتصدَّى و راها كثـرت يَا بـّيْ عنها لتعاب
راها تبكـي يَا بـّيْ عنا جحده و عْلى جالك لابسه فستان اعـذاب
كي ماكنت أنت هنا كانت ورده ضركه ذبلت يَا بّـيْ و غصـنها ذاب
طال عليها الصَّبر لحدود أتـعدَّى جفّت دمعة عينها و الراس اشـهاب
قالت ما يهـناش بالي ما يهدى لعلاهو يْبان بدري بعد اسحــاب
كان غطايا كان كسوة ومخـدَّه كان لباسي كان لي همَّه و احجاب
ما زالت كيما كانت ع العهده امعلقَّة تصويرتك ف الحيط اصواب
اتكلَّمها و تقول ويـن المـودَّه أتقدرها يَا بـّـيْ منـها واتهـاب
راها قعدت من لمحايـن تتغدى وكي تتعشى يَا بـّيْ تشرب لعذاب
ماكش ميِّت يَا بـّيْ تربط عدَّه ولّ غايب يَا بـّيْ من غير أسباب
الميت اتجي على ناسـو بـرده نار الحي تبقـى تـذري ف الهبهاب
قالت لو يجـي نعملـو وعده نعرض اهلو كـاملين مع لحبــاب
متفكراتك يَا بـّيْ في كل قعده راها دين عْـلى اجنابك يا هـرََّاب
واش يطفي على مّا هذا الصهده غيابك عنهـا يَا بـّيْ خلّط لحساب
بيك انتايا يَا بّيْ يطفى ذا الدَّاء و بيك انتايا يَا بـّيْ تبرى لعطاب
يخي ضاري فالكرم مولى جوده وعْلى النيف تلوح روحك في زرداب
ياك المسلم يَا بـّيْ عندو مبدأ يستغفر و يعـود لله التـــوَّاب
رانا رانا غـي نقابل ف العوده و رانا رانا كي الموعـل في لعلاب
انديرو حفله يَا بّيْ يوم أن تغدى ذيك الليـله يَا بـّـيْ كلش يطياب
تعم الفرحـة بيتـنا والسعـاده يهل هلال العيد عنا بعد غيــاب
طول الوقت عيون قلبي مشدوده الباب للـي يْبان نغدالـو طبطـاب
راني ناشر صورتك ف الجريده كلشي ممكن زرتها و ابعثـت اجواب
نختصرلك يَا بـّـيْ هول المده لو نشرحلك حالنا نملى لكـتـاب
حنن قلبك دير لاولادك هـدَّه خمل قشك يَا بـّـيْ و أرواح ازراب
31/01/2006
أنفلونزا السيارات
خبر المـوت يغم يجرح ويعــدّم موت الغدره على لخلايق يـا مقساه
وقت الظهر نحس ف الليل امظلّم ترعبب جسمي والعرق ف لحين كْساه
ثقلت لي لطراف و الفـم اتبكّـم فرفر عقلـي طار من جسمي خلاه
السبّة مصدوم من حادث مؤلـم ولاّلي كـابـوس ما طقتش ننسـاه
يعظم أجر احبابنـا في ذا المأتـم و يكافيهم بـالصبر عظيـم الجـاه
قدر ربي هكـذا لعمـار تّـم مـوت فريـدة غير كل واحد كيفاه
مـا تنفع دموع ماينفـع نـدم مـا عندو حيلـة العبد مع مـولاه
لكـن يا لحبـاب لازمنـا نفهم علاه اتراكم عندنـا ذا الهم عـلاه
لحوادث كل يوم واحنا غي نردم والفنـا خبر المـوت و عـاشرنـاه
لينـا رتبـة عاليـة في ذ العالم ثلث الشعب انتاعنــا لحديد اكلاه
كاين شي حالات مسؤول بنادم عيب إذا شفنـا العيب و خبيـناه
بعض السواقين هدرة غي بالفـم كّرهونـا مشـي الطريـق وملينـاه
مـن حقي لوكان في ذالقوم انذم نتساءل على البرمي ويـن الـقـاه
ونـدد ونـزيد نشكي و نلـوّم عالمسؤول للـي رخصلو و اعطـاه
مـا جرّب ماساق ما هو متعلّم قـانون المرور عمـرو مـا قـراه
شـاري سياره بيهـا يتقمقـم يحسب خلق الله غـي ذبـان احذاه
إيسوق بلا ضو ف ليل و يزدم و يقلك تقدرت و اللوم اعــلاه
و مأمن سيارتي لاشتى ظالـم التأمين يخلصك و حيـر امـعـاه
فوضى كبيره يديرها كي يتكلم ييـدو ف الفولة و راسو في قيفاه
و البورتابل عـاد فينـا يتحكم كم من واحد كان سبة في ملهـاه
تلقى طفل صغير ماهوش منجم و المصيبة تشوف فـي جنبـو باباه
تلقى للي مخمور شقفو يتلطّـم و للي فايت في طريقــو قاع اداه
ما يخزر عدّاد ماهو عارف كم غي متقـدم ما يشوفش واش اوراه
لا دودانـة نافعـة في ذ المجـرم قاتـل روحو و زاد خلق كثيـر معاه
اعلى غفله راح من الدنيا صايم و على غفلـه راح واحد مـا وصّاه
اعلى غفله راح من الدنيا صايم و على غفلـه راح واحد مـا وصّاه
العاقل كي يشوف ذ المظهر يشهم يراعي حـق المـاره و يخـاف اللـه
إشـاره تكفي اللبيـب و يفهم و الجاهل ما فيـه خيـر و نترجّـاه
تسابق وسط الطريـق و تتزاحم جمع انتاع لفاع يقـرت فـي بعضاه
ولّ سرب طيور طاير و يهـوّم و اسكن في جوف الهوى و الريح اداه
بعض الطرق محفره زادتنا هـم و من خدمها ما يخـافش من مولاه
شي مرات تشوف مظاهر تحشم تتعجب وتقـول يا سبحـان اللـه
السيـارة الخاصة فيها عمّـم دار العبـد مع الخضـره زاد شيـاه
من اثنين وستين مازالت تخـدم سايقهـا جـدّو و من بعدو باباه
و ابياس الطايوان كل يوم يساوم المغشوش اذا دخـل البـر اخـلاه
فات الأجل انتاعها واش يـرمّم شابت شاب احديدها واكلاه اصداه
يتهـدم صلب الحديـد و يتقسم يتلهـوث نعت الحنش علـى مـولاه
في طرف الطـرقان تلـقاه امعرّم ما يتيامـن ما يليـق اللعب امعــاه
تشوف العبد للي دقدق وتهشـم تشوف العبد للي فقد سمعـو وضيـاه
غاشي ياسر ضـاع عمرو وتحطّم واش بقالو كي اتحشت قــاع اعضاه
تلقـى للي مجروح غم عليه الدم امـا العبد اذا تفتت ما تـلــقـاه
منظـر يخليـك دايـم تتألـم منظر يـرهب، للعـدو مـا تتمنـاه
راها الحاله زايده غـي تتـأزم عم الضر وطال مـا صبنــاش دواه
كـل ساعه لحديد يسقينا بالسّم قعدنا غيـر نعـاودو في كلمـة آه
نتمـنى لـو كـان احنا نتنظم انخفـف مـن ضرنـا و انحـد ابلاه
نتمسك ب طريق ربي و نداوم ربي وصّى بالحذر عبــدو ونهــاه
كرمنا و اعطى العقل لبونـادم بـاه يخمـم فضلــو عما سـواه
أغفر يـاربي لموتـانا و ارحم والصلاة علـى النبـي رسول اللـه
عين الحجل في : ديسمبر 2005
مظاهر مزعجة
وقت الزربه و العجب كلش يقصبْ وقت الغتبه و الـّربا شتت لحبـاب
غاب الصدق و عادت الأمه تكذب هم الرشـوه ريّب عليـنا لـدراب
مول الدار و عاد في بيتو يخـرب تشتت شملو حين كثرولو لحــزاب
اعلى الدراهم غي تخبش بالمخلب مثل النمر إذا اغضب كشر ع النّاب
دارونا نعت الغنم في سوق اجلب و ساقونا سوق المعيز مع لشعــاب
ولّ الشعب كي اسحاب المتقلب ساعه تصحى حالتو ساعه هبهـاب
لعبو بيه وعاد في وطنـو يسلــب و يريب في دويرتو من دون أسبـاب
والمقاول راه في الدولـه ينهــب و المثقف راه جابد على لجنــاب
الرّاقي بزناس عـرّاف و يكتـب و المير للي اتخيرو يصبـح كـذاب
الأمي إمــام في الغاشي يخطب و الشواف اطبيب يشفي بالأعشـاب
التاجر محبـوب و السـارق يعجب والبطال اخروف في يـد الجـلاب
جمعيات مخلطـه من هـب و دب وقْليلـه للي ماشيه ف الخط اصواب
وللي عندو راه زايـد غي يحـلب والزوالي ما بقـى عيشــو يطياب
عاشو غير صْحاب سيدي واش تحب والمعريفه ف لوطن ضربت لطناب
عم الفقر و عـاد زلزالو يضرب منّو جات أمراضنا غاب الطبـاب
البطاله فقـر و الفقــر يشيّب و يطيح من كان في عزو يتهاب
احليل البطال معـدوم المنصب ما هنّاهش خا طرو ما طاق اعذاب
في وطنو و يحس روحـو متغرّب ما هو داري ب البلاء مادار احساب
ابلا خدمة واش من حاجه تعجب وقت الدورو ما تصيبش فيه اصحاب
حتى الطلبه ما تلـيقش كي يطلب وين يروح مسكـره عنو لبـواب
ما صابش كيفاه من وطنو يهرب واش يْقوّم حيط راشي بعدن راب
البطـاله شلتـو راه اتعّطــب و اتعوّق مسكين طاب جنانو طاب
لا زوجة لا دار لا صبي يلعـب متودر مسكين عايـش في سـراب
مافادت في جيلنـا علم و لا طب و ادّرق قاع اهلالنا من الساحة غاب
والتسوّل عـاد للأمّـه منصـب و دخل وسط جموعنا شايب و شباب
ف لجامع فالسوق مثل مطر يصب تلوح بعينك ف الهوا تلقـى طلاب
طفله صغيره في لُعْمَر تخرج تطلب و تفرش كارطونها قـدّام البـاب
وتحنّن في صوتهـا كلّـي تندب حتى لي متزوجـه و للي عُــزّاب
وين الرّحمه و ينهي أمـة لعْرب ورّاهى زكاتكم يا أهل النّصـاب
حتى الصّبى ف لقهـاوى يدّرّب و يفنّن في لبستو منظر جـذّاب
يحترف و يعود من الطلبه يكسب بطلوه على قرايتو و انسى لكتاب
حافي من الرّجلين والشعر مشبشب و يقلك يتيم محـروم مـن الأب
يَصْبح يمشى ف الشوارع ويْطَبْطبْ و يتعلّم بعضْ الخدايم ميش صـواب
فى صغرو و يبان مسكين معصّب الجسم الناحف ما يقاومشي لتعـاب
يحير بن ادم كيف من ذاتو يهرب يتقرقش ويعود هامل في لعــلاب
ياسر من شباب أهـرب و اتغـرب و لما هجر م بلادنا هاذو لسباب
ودخل وسط بحـر للعوم يجــرب فاض عليه الموج لاحو في زرداب
البرانى عـاد فينـا يستغـــرب كنا أمه شامخه قبــة لـقبـاب
واش من قلب للى بقى يامن بالحب واش من شعر نسرحو بعد للي شاب
واش من حل للى ندير و ينـاسب واش من عمر يفيـدنا بعد الشبـاب
ادعيتـك يا خـالقي و نا نكتب احفظ جيل بلادنا يكفيـه عـذاب
لا تخيبني يا الله في ذا المـطـلب يا سهّال همـومنا بعـد ن تصعاب
21/04/2005
نكارين الخير
تتعجب في ناس واش راها تخــدم بعيني شفـت عجوز تبكي غضبانـه
يا مخلوقــه واش عنك هـذ الهم اوحيـده ولّ مريضــه تعبانــه
نطقت ليـا قاتلـي أمــر تحتم من عـزي وليـت ضركه في هانـه
راد عليا خالقـي و الوقت احكم راها اشـوارع من امثالــي مليانه
من ربيتــو عاد عنـي يتهجم دار عليـا و جار خان الأمـانــه
هان وليدي عادت لمـرا تحكـم زَوَّجْتُو وفرحت وخيّــرت فلانـه
يتقشش كبدي فـي وجهي و يذم و يقلـي وعلاش مرتي زعلانـــه
دللـت و قريــت ظنيتو يفهم نبقى عندو طول عمـري فرحانــه
عاد وليدي لا يحـن و لا يرحم و ارمـاني وسط الشوارع حفيانـه
مفزوعـه ظنيت في نفسـي نحلم حين فطنت لقيـت روحي عريانـه
عريانه لا خال عنـدي و لا عم قعدت وحيده مع احزاني سهرانــه
ريح الوحده صابني رشّ لعْظـم شجره ذبلت في اصحاري عطشانـه
طايح قدري ما بقى واحد يهتم و ما قعدتش خلاص عندي مكانـه
هذي هي حالتـي ربـي يعلم وشوفـو ما تخـدم بعـض الجبانـه
يبقـى هو مـع ولادو يتنعـم واه يهـون عليــه بُعـد الحنَّانـه
وَدَّرْ عقلو عاد ماهوش بنـادم كَسَّـحْ قلبـو نـح منـو لحْنَانَـه
صبـرا صبرا راه ربـي ينتقـم العـالم بالظـاهـره و الخفيانــه
تعيا تلحق بيه يعـيا و ينـدم و يكـافيه الله كيمــا كـفانــا
من ذ الفيئة تحيـر تبقى تتألـم لا شفقـه في قلوبهــم لا فطانـه
نكَّارين الخيـر قطَّـاعين الدَّم مسلوبيـن عقـول جملـه خوانـه
اثعابيـن ملمده تقطـر بالسم لا حشمـه لا نيـف و لا ديانــه
يليقلهم قانـون بالسيف يعـدّم من هـذ العصـاة يعمـل جبّانــه
يتبرأ منهـم كل مـن هو مسلم حين يموتـو ما يصيبـو دفَّانـــه
والله مـا يديرها عـاقل يفهـم يغيض الحال على النـاس الغفلانـه
خطبت و بطلت
راني جايك يا اختي ناوي نخطــب ما ذا بيا مصارفك تكــون اقلال
راني ف الوحـده انقاسـي نتعذب حاب تكوني زوجتي مكسوب احلال
غير السعاده للـي فيـها نطلـب بيا حبك يا اختي ماهـوش المــال
متشـوق انجيك للبـاب نطبطـب حايـر منك دايما ً و عليك نسـال
طـال علي الصبر و اعييت انقـب وانحوس على الزينــه فـي لخصال
باه نريح خاطري شاهـي نـزرب باش نعمـر دارنا و نجيـب أطفـال
قالت لي أرواح يا خويا و اقصـب أنا و انـت يا لخـو ف لحال أ مثال
كيفي كيفك حالتي ماهي تعجب همـي همك حاملـه مثلو لثقــال
الصايم مشتــاق لآذان المغـرب و أنت راك تبان كي ليـلة شـوال
رحت اديت أميمتـي قلت نجرب هجمـو عني أهلها تقـول أغـوال
ما قـالو أهلا و لا كلمة قـرب سقساوني على دراهمـي قداه انسـال
جبدولي كراس مكـتوب مرتـب شرطولي أمور ما كانت علـى البـال
قلت لهم بطلت ما جيتش نخطـب و أسمحولي ما نطيق على ذل الحـال
ما جيتش نشري في بقرة تحلـب و أنتم ما تليقـوش لولادي لـخوال
غاضتني هي كـي قعدت تنـدب خفت الصدمـه تزيد للخلقه لهبـال
وخرجت من عندهم زعفان نسب و كلامي مقصود مانيشي جَمَّــال
من هاذ الأسـباب الوقت اتقلب و تعنست بناتنـا قعـدت هجـال
راني خايف ولادنــا منـا تهرب و اتروحنا الفايـده مع راس المـال
خافو فينا الرب يـا أمـة لعـرب ضيعتو شبـابنـا و العمر أكمـال
راه الغربي عـاد فيــنا يتعجب يستغرب ف اعراسنـا ولات أهوال
فرطتو في دينكم و الجهل اغلـب و مررتـو معاشنـا زدتوه أعـلال
شبنا من اللحيه و راه المخ تعـب و ما راهيـش أقوالكم كيما لفعال
مرضتونا ما بقـى فيـنا يعجـب و طلعتـو بناتكم فـي روس أجبال
حرقتونا و للـي قربكـم يلهـب حقرتونـا واحنا كثرتنــا بطـال
غليتو سوماتهــم كسوه و ذهب وكثـرتو شروطهم صبحـو همـال
يبستو شجراتـنا ولات حطـب فاتها وقت ثمارهـا صـارت تذبال
معذورات بناتنا مـنا تغضــب و على الرجال الزايخه ذ الوقت أكحال
حاشا أهل النيـف ديانه و نسب شرع الله تزويجهـم هاذوك ارجـال
2004
الموؤوده
يـا بنـي عمي وقتـنا ورى ما فيه خرجت فيه الناس للعيـب اقبــاله
وللي شــاف العيب لابـد يوريه نستسمح لشـياخ فـي ذ المقـاله
يا ترضـى لو كان خبيـر انسقسيه نتمنــاه يكـون راجل عــداله
يعرف للقانـون ولّ يسـمع بيـه ولّ شايـف من قـبل كي ذ الحاله
ولّ راجل ديـن بالحكمـه فقيـه نستفتـيه يفيـدنا فـي المسـاله
حالة شيخ كبير مـن سبعين لهيـه و طفله ف العشرين تشـبه لغـزاله
غرو بيـها أهلـها باعوهـا ليـه هاذون ايبيـعو السلعــه جمَّـاله
الراجل عاجز و اطْرَش حاكم وذنيه يبـات ينازع و اصْطـر داير حاله
تتدحرج عكازتو ما بيـن يديـه آخر شيبو شيخنا شـد الدالــه
ضربـة شمس ادوخه زفـه تديه القنور و زاد فوقـو ظُــــلاَّله
واش يعـافر شيخنا واش يرضيـه طول النهار يظل دايـر شغــلاله
أنباركـلو شيخـنـا ولّ انعـزيه اعلـى كبرو دار فيـنا مهــزاله
زواج الأورو ذون متفـقين عليـه قمـح العتبه بدلــوه بنخــاله
حب الدراهم زادهم تيـه على تيه على الدورو دايـــرين البهداله
متقــاعد قالـولها أهنا و لهـيه و الدراهم بزاف عـنو هوطـاله
عندو زوج أحواش و امحلو تكريـه وعلى ظهـرو عفـسي بالصنداله
حرت في ذ الـقوم كيفـاه أنسميه ف القرن العشريـن كاين جوهاله
ما سالـوها ما قالـت المخلوقه إيه مـوؤودة سميتها يا رجـــاله
سرقـو منهـا رايها حطوه ابجيـه و اتّفـقوا على زواجها بالكفـاله
حرمـوها من شاب يبغيها و تبغيه وأدوهـا يا خاوتـي ذ البوخاله
شاب اصغير وضاع ما بيـن أمَّاليه المعيشـة غالـيه والبطــــاله
لو يتقـدم شـاب بابـاها يكويه يتفاخر بعيوب بيـها يتعـــالى
ما يقنعش خلاص حاجة ما تكفيه و يزيد يسقسي العمـه والخــاله
يتخبـط في ظـلام مـا له تشبـيه هو يرقص و العجايز طبــــاله
عيب عليـكم صغـرنا لعبتو بـيه الدنيا دالات و أعطـونا دالـــه
لفحل كـي يلـقالها راجل يشريه والله ما يشتـي الطفله هجــاله
ما يتكبرشي عاللـي جـاء عانـيه ما يعرفش خلاص ذي كلـمة لالا
وراكم يا شيـوخنا أهــل التنبيه دلونا يا اكبـارنا يا عوقـــاله
راه أتفرقع عشنـا نوضـو نبـنيه رانا عدنا كي الموعل رحَّـــاله
يا مقاول وينهـو صوتك وريـه وراهي خصلاتـكم يـا رجـاله
اشـويه من جيلنا وشـوي خاطيه مسؤوليـن الكــل في ذ المسأله
واش بقى كي فات من ربعين لهيه و اتبقى على ظهورنا عايش عـاله
غيـَّر ف العادات شوها تشـويـه اتخلط فكــرو بالفتـن و الرذاله
استورد عـادات سمـاها ترفيــه آمن بيها ساقتو للظـــــلاله
اسلاسل ف الجيد و الضفر امربيـه شعر مدربي طاح دايـر كعــواله
الزواج الغالي جيلنا ما طاق عليه والمشيـخ تهولت دارت حـــاله
ماهوشي من دينا هاذ التشبـيـه احنايا أهــل الكرم و الأصــاله
يخي كنـا ضيفـنا نتهـلى فيه و كثرتنا وسـط الخيـــم وموَّاله
و الزوالـي انلايمولـو و انهنـيه يتزوج و يعـود سيـد الرجــاله
هو يمشـي والزغـارد في تاليـه قدامــو بارود دايــــر شعاله
في ذ الليله يهد عرشـو قاع يجيه تشوف الحاره زاهيــه بالخيــاله
حتى الزوجـه طايعاتـو وامَّاليه ف القيطون تدير منســج و خلاله
على من نبكي وقتنا ولّ ماضيه ولّ نبكي علـى الدنــيا البـداله
و للي شـاف العيب لابد يوريه نستسمح لشياخ في ذا المقــــاله
كلمة حق نقول والصح بعينـيه ما رانيـش نذم ناسي مـن والــه
نتـوسلك يالله جيلـي تهديـه احنـا ف عرضك يا إلاهـي تعـالى
والصلاة علـى النَّبي و آليــه جد الحسنيـن سيـد الفوضـــاله
للي جاب الدين للكون و ما فيه مزين هـذا الدين متــقون افصاله
المتهم
حـيرني شفتـو المسكـين يغني يتمحن كيمـا العبــد للي مهموم
لـو ينطـق ليـا نظـن يعاتبني و يقلي يا صـاحبي واش هاذ القـوم
لا مـن جابو نيف عني واعتقني قهــروني راني بــلا سبه متهوم
قدري عـالي كنت زاهي متهني كنت نـداعب ف اسما و نشق غيوم
كل البر للي خلق ربـي وطني نطلع طاير ف الهوى زاهـي و انحوم
ما كاين قانون ضـدي يمنعني بـلا تأشيرة نسيـر للوطن المعلـوم
وبلا رخصه وين نفحتلي نبنـي عايش والـع بالسفــر ديما مغروم
نشرب غيم الريح يكفي يرويني ندلل فوق الشجر نغــدى و نهوم
نتفسح وسط الجنينه و انـدني مصباحي ضـو القمـر وشعاع انجوم
نموج عْلى لرياف زينه تعجبني و امدينتكـم جوها مليان اسمــوم
دارولـي فخه وراهم حكموني راني نعت للي سكر ما عنو لــوم
نتخبط نلقـى السلك امحاصرني نـوع أمخيـر من الحديد اللي مبروم
اترصد لي مولاه ناوي يسجني اعْلـى جالي مـوجدو جاهز مخدوم
غي خمسين غرام نسعى في وزني و باعوني يتزايدو عنـي ف السوم
في زنزانه غيـر وحدي عزلوني راه اصرالي كالطفيل للي مفطـوم
في صندوق حديد راه امعلقني وكـل اصباح يتـوق عني بالسلوم
ساعه ينساني وساعه يطعمنـي و شي مرات نديرها من غي عالصوم
و يجيني كـل صبـاح يقلدني مـاني عارف لا يعـاير لا مغروم
نستنى بلاك قلـت يحـاكمني استنيتو ما بـاش يلحـق ذاك اليوم
داخل سجني غي الظلام مْونسني الله غالـب حالة للـي هو محكوم
خلـق الله اتبـان و انا درقني خلق الله امسرحه و انـا محــزوم
راني صابر و الفـراق امعذبني و ماني عـارف غيبتي قداش اتدوم
نتّكى حتـى السكره تـديني و ما نتهنى غيـر في ساعات النوم
وكـي نفطن نبدأ انخمم و انغني شـاهي نهـرب مالقيتش مين انهوم
سال على لحبـاب من بنتي لابني و خبّـرهم رانـي بـلا تهمه متهوم
متوحشهم راه شـوقي قـاتلني راه القلـب اتـوالهم حـاير مقسوم
اميمتهم ما زالــها تتفكـرني و فوق السجن تجي تصفّرلي و اتحـوم
ترفعلـي فـي صوتها وتسمعني حتـى نايا كلامها عنـدي مفهـوم
العين الخضره والشعـرطايح مسني أصفـر يلمع كي الذهب باهي مرقوم
الرجليـن البيض والرقبـة بني و النغمه تشفي العبد للي مسقـوم
كانـت ديما ف اسفر اترافقني و اقضينا شهـر العسل فلجو انحـوم
نركبو ظهـر الهواء و اتساميني و نحطو طرف البحر في وقت العوم
انداعبهـا ف اسمـا و تغازلني المحبـوبه عندها ســرى مكتـوم
ما جـاني تخفيض لا حد نفعني عندي مـده طايله و أنـا مـردوم
و عْلى أهلي مانعين يزرونـي و لا محـامي جـا يدافع ع المظلوم
عـارف ما راهوش رايح يرحمني و اهنـا ماتو من قبل كم من مرحوم
غير اكتب عني قصيده و انصرني لعلاه يخرجـو كانـــش مرسوم
يمنعـو مــا يزيد حد يصيدني يصبح عرشي كي انتـم فارح ملموم
فرج يا ربي عليا سرّحنــي يا ســلاك الحـاصله و للي مضيوم سخر ليـا كاش واحد يطلقني نتحرر و انعــود كيمـا كنت انحوم
خليتو و امشيـت يبكي و يغني يتمحن كيمـا العبــد للي مهموم
جوان2007
ليست هناك تعليقات:
إرسال تعليق