وكـــــــري
سهّلّي يا خالـقي في ذ المبـدا وسهّلّي كلمه نقول على لبطال
أهل الجوده والكرم أهل العهده وأهل النيه والصفا نسوه و رجال
مغروسه عـادات فينا متمده لوتحسب خصلاتنا و تْعد شحال
نرحّب بالضيف لينا كي يغدى و البرّاني بينــا يرتاح الـبال
المنكر موحال عنّـو لا نهـدا والموذي بيناتنا مكشوف اقـبال
لانا حقاريـن و لا نتعـدّى و نار الفتنه ما نخلوها تطـوال
تختلف لعراش لكن متّحـده و نهدّو وقت المحاين كي لغـوال
اتربّينا ع الوفا نيف و عهـده ورثناها من جدودنا اجيال اجيال
معدن صافي لا يحول ولايصدى يتشرف للّي نكونو ليـه اخوال
يا ويلو من حب عنا يتعـدّى و مع الرجله مايفيدش قاع المال
كذا من بيبان عنّـا مسدوده رغم لي تاريخنا صنعــوه ابطال
الحضني تلقاه في وقت الشـده الكلمه و النيف عندو راس المال
عدّينا لهمـوم و ليـالي سوده شاركـنا أهل المدن و لي رُحال
اقرا ف التاريخ لينـا شهـداء ذقنا مر فرانسا عشنا لهـــوال
خضنا معركات لا تحصى عده و معروفين رجالنا ما همش قْلال
ماني يا حضنه بوصفك نتحدى تاريخك مازال عبرة للأجـيـال
بن عيسى خلّى قصايد مشهوده و بن الزوالي للي ابدع في ذا المجال
محمد بوضياف ورجال الهـده ما زالو لليوم مضرب للأمثــال
مازالت آثار مجدك موجـوده يشهد عنك ذا لٌوكَر قلعه و جبال
ياحضنه ياساكنه وسط الكبده وما نعشق يا زايخــه مثلك محال
يا حسراه على الزمان للي عدّا و يا حسراه على الزمان لي بـدّال
أنا خوفي بلادنا تقعـد جرده و الورده بيناتنـا خايف تذبـال
أفطن ياذ الجيل شمّر ع الزنده و للي يخدم يـابني يربـح و يْنال
وتمهّل غي بالعقل وحده وحده وكون معلّم لاتطـاوع قيل و قال
كانو لينا رجال في وقت الشدّه يا خساره في وقتنـا ولاّو اقـلال
كلمة حق نقولهـا و بلاجحده المتأصّـل ما يعيشش بالتختـال
عاونّي و نعـاونك ما يبقى داء باه تولي بلادنـا في أحسن حال
والصـلاة عْلى انْبي نور الهدى محمد شفيعنـا يـوم التهــوال
16/09/2005
حدثني بويا
يا بويا كيفـاه ف الماضي كنـا وحدثنـي كيفاه كنتو في لحـوال
أنت راك كبير تشفى للمحنـه و في عمرك عدات عيطه من لجيال
أنطق ليا قال راكـم في جنـه احنا بكري يابنـي ذقنا لهــوال
قرن و ثلاثين و احنا فـي غبنه و مسلوبـة خيـراتنا و حْنا همّال
ذقنـا مـر فرانسـا وتعذبنـا اسولات على لوطن صحره و تلال
غرست وسط عراشنا نارالفتنـه و ما رحمت لاشيخ منا لا أطـفال
سركلت عالريف حرقت غابتنا و بالأسلاك الشايكه دارت لقـدال
اتحقـرنا ف الوطن و تهمشنـا وتشردنا يا بنـي نســوه ورجال
ف ربعة و خمسين عنها عولنـا وسبـع سنين بحالهم ماهمش اقـبال
من قلب الاوراس شعلت ثورتنا و في الشاويه يا بني كان الميثــال
حيا ع الجهـاد كامل قررنـا و اتكلنــا عليـه حق الإتـكال
اسلاح الإيمـان بيه تمسكنـا و مع ربي خالقي كلش يسهـال
قاسينا لهموم ع القهر اصبرنا و للـي صابر يا بني لابـد يـنال
قلنا ذ العديان لازم تتـركنا وشعلت فيهم نارنا تقدي مشعـال
وتحزمنا على البلاء و تعاونـا وكما كانت أقوالنا كانت لفعـال
كيفالبدوي كي الحضري شاركنا و هذا يصنع ذاك يجمعلو ف المال
كانو لينا ابطال و موالي قمن وسط الغابـه كي الذيابه ف تختال
هذا يجري جايب الما يسقينا و هذا يجري جايب طعامو وكـال
والنسوان تبات تفتل ف لجْفنه و تطعم فينا من لَحْيا من تحت حيال
وتداوي لجراح تغسل كسوتنا ومغرومه برجالها ع لْوَطْن تسـال
محبوسة وتظل في وسط الركنه جيل الزماله يا بني جيـل الخلخال
حتى الشاعركان بينا يتغنـى يمشي في لسواق ع الثـورة قوال
جندي بكري يابني مولى فطنه و من كاف لكدية يطير مع لوعال
إذا قرر ما يعلمهـا حرنـه و إذا شاف الصايدة دامـي قتـال
هذي حالـة حالنا في ماضينا و اليوم الحمد لله زالـت لعـلال
الخامس م جويلية فيه أفرحنا و تلمينا بعد مـا كنــا رحال
راح الهم وراحت معاه الغبنه و تهنينا من البلا و ارتـاح البال
راه الشعب اليوم من الظلم تهنى وكان على لكتاف حامل ثقل جبال
محروم الخيرات مـا ذاق البنه و مستعمر مربوط مسكين بلحبال
ف ثنين وستين شعلت شمعتنا و طلعت راية بلادنا نجمة وهـلال
أردمنا لحزان ضرك أتهنينـا و تطورنا يابني مـن حال لحـال
هذ اليوم الزين فيـه اتلمينا واش بقى من فرانسا غير الأطلال
وافرح الشباب رجعت وردتنا و جات الأمنية اللي كانت خيـال
بالبترول الخـام ربي ضوانا و قمح العتبه راه هامل في لعطال
أنخيل ورمان وأنواع الجنــه و هذا يخـدم ذاك يتنزه جـوال
لا تنسى عديان بكـري فرقتنا و اتفكر ديغـول عنا ماذا قـال
الجزائر و فرانسا نفس المعنـى والخرجـه من عندكم راهي محال
قلنا يا ديغول أخرج وسعنـا وهذي راهي بلادنـا يدزي تختال
لا تحقرش رجالنا أهل القمنـه و قداسين اكتابنـا و الكل أبطال
اللي ذاق المر حقـو يعذرنـا و ليل الحقرة دايم الظلمـه يكحال
يا ولدي نوصيك علّي سمعتنا اخدم وطنك يابني واتقـن لعمال
احذر بالك كونك مولى فطنه و ماتقلدشي يا بني غاشي لـرذال
احذر بعض الجيل غير عادتنا و ماتمنشـي دهرنا هـذا بـدال
هذي باختصار قصة ماضينا وهـذا جوابي ليك عن أول سؤال
للّي جاب القول من أهل الحضنة والجزائر أمنـا أم الأبطــــال
الشاعر مغروم بالوطن تغنـى و الصـلاة على النبي خاتم لرسال
2005
هلال نوفمبر
بعـد الظلمـه طـل نوفمبر لهلال نـاض الشعب انتاعنا واعلن ثـوره
اتحزمنا للعـدو نسـوه و رجـال قلنا يليق بـلادنـا ترجـع حـره
و تفرقت جيوشنـا حكمت لجبال و الأوراس للـي بـدا أول مـره
ثم شعلت نارنا تقـدى مشعـال قلنـا ياكفّـار يدزينــا حقـره
غيرنا نوفمبـر من حـال لحـال و اتهول هذا الوطن دشـره دشـره
نار الحقرة مارضينــاها تطـوال شعب الدزاير ع لُوطن عندو غيره
بالإيمان فرانسـا ذاقت لـهـوال قلبنا حياتها رجعــت مــرّه
يا سايل خصلاتنا خصلات ابطال من المليــون ونص نعطوك العبره
مهما طال الحال نوفمبر عالبـال و للـي بيه بلادنا صبحت خضره
نوفمبر يا هلال كـي أول شوّال يا زايـد لبلادنا جـاه وشهـره
سبع سنين انت للي كنت لينا فال نوفمبر للي غـرس هاذي الثمـره
نوفمبر اللي رسم نجمـة وهـلال نوفمبر للي حيـّـا راجل وامـرا
يانوفمبر بيك عمر الوطن اطـوال نوفمبر يا قاهر جيوش الكـفـره
نوفمبر برنوسنا نسوة و رجــال نوفمبر ماهـوش مجـرّد ذكـرى
من يقبل كيد العدو يعنـي ذلاّل و الميت ماهوش ميّـت بالمــرّه
موت العزه خير من عيشة لرذال عيش الذل ارخيـس و البنـّه مرّه
بـفضل الايمـان بفضـل الرجال خرجنا عديـانـّا عـادوا بـرّا
لا تنسى يا جـيل الدم للي سال و لا تنسى يا جيل انواع الحقـره
لا تنساش اجـدودنا ذاقـو لهوال لا تنساش اتلولنا كـانت صحره
اتفكـر يا جـيل نوفمبـر لبطال ساهم وابني ذالوطن حجره حجره
ما ننكرش الخيـر مهما طال الحال يكثر خيـر للي انصر هاذ الثوره
للـي عاون بالسلاح و مـد المال و للي عـلا صوتنا ضد الكفره
أرحـم ياربي الشهــداء لبطال و ارزقهم فـردوس ياعالي القدره
بيهـم درنا عرسنا و ارتـاح البال بيهـم وطني عاد باهي ف النظره
شلوشـو جيش العدو ذاق المُحال هم للي غرسولنـا هاذ الشجـره
أحفظ ياربي بلادي صـون الرجال و اجعلها ياخالقي جنه خضـره
الصلاة على احمـد خـاتم لرسال محمد رسول الله زيـن البشـره
12/10/2005
وطني
مهما قلت على لوطن حسيت اقليل هاذ الوطن الزين فضلو بالياسر
رباني كيما امّا من كنت اطفيـل و تعب عني كي ابيْ ديما ساهر
ما يتقارن ذ لوطن ما ليه امثيــل طول العـام ربيع زاهي بنواور
تحت الارض و فوقها لنهار تسيل جل العالم راه مـن وطني غاير
علام يرفرف فسما يغدي و يميـل و يفرفر نعت الحمام للي طاير
البر الواسع فضلـو ربي تفضيـل و عطالو لكنوز من الخير الوافر
ارض الجوده و الكرم و ابن السبيل شهدولو بيها المسلم والكافـر
متمسك بعروبتو وطني اصيــل قبلة للثـوار ارض الجزائـر
نوهب نفسي ما نردش ليه اجميل و انحارب عنّـو العدو الجائر
وطني زين و زين فايت كل اجميل يبهـر إلّي جا على غفله زاير
مثلتو عرجـون دقله فوق نخيل عسل النحل يصب منو يتقاطر
حتى ناسـو زايخة من جيل لجيل ولد بلادي نا يسموه الثايــر
كل الشعب ثار في يوم التهويـل عـلا صوتو قال يا وطني حاضر
الشامخ شامخ ما يحب يعيش ذْليل تاريخو معروف م العهد الغـابر
قصّف عمرو باه عمر الوطن يطيل بشـرى بالفردوس ليه وللصابر
ذاق الهم و ثار شاف المستحيل التاريــخ يعيـد هول المجازر
من لاشيء رجالنـا دارو تاويل خلاو الثـــوار بيهم تتفاخر
ما خافوا حشود و لا أساطيـل ثارت قاع الناس صبية و احراير
ماهابوش جيوش ترهب وامشاعيل و قنابيـل تصب عنهم بقناطر
دار المعجـزات عقّب ليل طويل المليـون و نص عبـرة للثايـر
خوذ العبرة خوذ منهم يا ذ الجيل و تعلــم كيفاه تركب لمخاطر
حافظ عن خيرات وطنك يا أصيل و احذرلك فخات من كيدالكافر
لا تنسى يا صـاحبي عديان اقبيل الماضـي مازال يجرح ف الحاضر
قرن و ثلاثين فاتـو كامـل ليل رانا ف الخمسيـن مازال انعافـر
كذا من معاق كذا من قتــيل من الالغـام للّي زرعها ذ المـاكر
و للي يعرف ذ لوطن يقول احليل تتربص بينا العديــه و تقابــر
من كل جيهة مشعلين عليه افتيل هذا الوطـن الزين عديانـو ياسر
وكرجدودي ضايقين عليك الويل غيرك ما تحلاش حاجة ف الخاطـر
فيك عيوب و فيك بعض العراقيل لكن ديمــــا بيك رانا نتفاخر
فرج يا ربي و داوي كل اعليل امرك كون يكـون بيدك يا قـادر
سقّم وطني يعود كيما كان قبيل باركلـو و يْزيـد خيـرو يتكاثر
جوان 2008
الكمين
من هـول العراق نكتب ذ الـمره و نهدي للمقاومـه هـذا السطريـن
اسلاحي ملحون ورصاصي هـدره و دعايا للـه رب العـالمــيـــن
كمسلم نحس روحي فـي حيـره و عْلى خـويـا مـا يغروني لخريـن
شفنا يالحبـاب فيها وش صْـرى راها الدمعـة سايله و القلب احزيـن
خـيرك سابـق يوم كنا في ثوره و مْعاونتك في ظهرنا راها ديـــن
اتلمت عديـان عنـك بالكثـره و قعدت يــا غاليه بين البينـيــن
بيـن انياب ذياب و مخالب نمـره بيـن الطماعـه و بـيـن الصيّاديـن
غـارو من صفات عندك مشهوره و اعجبتيهم باهيـه و المنظــر زين
الموقع جـذاب يبهـر ف النظره علماء و ابطال نـاسك معـروفيـن
على جـال البترول دارو ذ المكره و للي يامن غي اجياحه و اترعويـن
مـاهـو لاسلاح و لاهـي ذره غـي تهمـه و ابناولك بيها كميــن
واش يديـر وعيل مابين طيـوره واش يديـر خروف مربـوط الرجلين
واش يديـر وحيد ضدو معموره و ملمومـه عنّـو ذيـابـه و ثعابيـن
صار الحكم اليـوم في يْدَيْن العره و زادو يابغداد في جرحــك جرحين
مقصودي قانـون يمشـي للّوره مجلس أمـن فيــه روس الشياطيـن
و المسلـم ولّ يساند ف الكفرة انكـر أصلو خان و ارتد عْلى الديـن
واه الخـو يشتي لخـوه المضره و يبنـي قـاعدات للصليبـيـيــن
طيارات اتحوم مـا تترك جـره تقنبل و تبات عـنــد الحـرميــن
تتمحى منها الحجره و الشجره تقتـل فـي أهـل المـدن و المعزولين
تزدم شاو الليل و تزيد البكره حين النـاس رقـود و الهربـه لا وين
تْهوهي عْلى لَتْلول تقلبها صحره ما تفرق ما بين عسكـر و مساكيـن
تكنولوجيات تـوزن بالشعره اتحقق مقصودهـا في رمشــة عين
عار علينـا باه نسكـت بالمره و عـار عْلى حكـام عادوا محكومين
يا عجابه كيف نقبل ذا الحقره و يا عجابه كيف نخزر غـي بالعيـن
ما يكفي تعليق..ما تكفي صوره يتألّم من شافــها و يْبات حزيــن
أبو غريب مثال يتبقى عبــره ماذا اتهــــانوا فيه رجاله زينين
صرت يا بغـداد في عيشه مرة و تْلوث حتى الـمـا وسط النهريـن
كنت تحفـه غاليه مثل الـدره كنت قلعـه شامخـه و الحصن امتيـن
السور للي كان مبني بالحجـره اتهشم و عاد ضركـه غـي بالطيـن
مسدودة لحدود صرت مهجوره تبكي ع الاطـلال و اهلك محروميـن
و الصحافـة مكتفه ماهي حرة و قنوات امضاده للمقـهـوريــن
قسموها بغداد قلبوها دشـره و الخـاوه سمـّاوهـم إرهـابييـن
ولد الحره راه عافس ع الجمره ولد المجرم راه يذبح بالسكيـــن
هذاك لي راه في صف الكفره إلّي حب يقسمك عْلى نصيـــن
انسى خير بـلاد كانتلو ستره دجلة و الفرات أرض الرافـديــن
يا خاين ما فيك نيـف و لا غيـره مـا ينفـع لوكـان تستغفر سبعين
شوف المصحف شوف و اتمعن واقرا جهنم تـاكلك يابــو وجهيـن
يتعـذب للي لبس ثـوب الغـدره و ينـدم ويكون خاسر ف الداريـن
يا قبله كيفـاه عـدت للظهــره و يـا أمـه كيفـاه ننسى فلسطين
ما زالت للآن تبكـي مقهــوره و تنادينــــا وينكم يا مسلمين
واللــه مـاظنيت تعقر ذ الحـره آخـر واحد جـابتو صلاح الديـن
نختم بالدعــاء قولي يـاحضـره و ياسامعني مع دعايا قـول آميـن
طفّي ياربـي عليهـم ذ الجمـرة غيث اعبادك يا إلهي يا معيــــن
انصرهـم يا خالـقي عالي القدره و انت أمـرك يـالله بين الحرفيـن
الطف بيـهم يالله راجل و امـرا أرحـم الموتى و ارفــق بالحييـن
و الشهداء وعدهم جنـة خضرا و الأزواج انتاعهم مـن حور العين
بجاه الصبيـان و شيـوخه تقـرا و بجـاه القـرآن و احزابـو ستيـن
بجـاه الأميـن طـه و العشـره انصـر يـاربـي جميـع المؤمنيـن
الف صلاة على احمد زين البشره خاتم الانبيـــاء و سيد المرسلين
17/11/2005
هيك المرجله
احنـا لا نبكي ولا نرثـي شهيــد وعــد المولى رازقو في ذيك الـدار
الباكـي يبكي على عربــي بليـد باع الوطـن وسـار في صف الكفّار
والنـوّاح ينوح عن هـاذ العبيــد الناس للي لابسـين اثـواب الـعار
تتـداول لــيام و التاريـخ يعيـد هكْـذا في لبطال بكري ثاني صـار
شفت الموكـب بَرْوايـح و زغاريد فكرنـي في عــرس عمر المخـتار
شفت الشامخ ف سلاسل من حديد و خلفو شفت رجـال بمْلايه و عْجار
باهي الطلعة بانلي مزيــود جديد قمـر أن شعشع ف اسما ضوّى لقطار
عينو ترهب كاسحه كي عين الصيد ولـد اللبّـه ما يعابر حجـم الفـار
حامل مصحف عاشق فنون التجويد آخـر قولـو وحّـد الله القهــار
وداعاً صــدّام حــسين المجيـد وداعـاً حفيد نسل بني حيـــدار
قدر عنك خالقـك في هـذا العيد ترحل شــور اصحاب نبيه المختار
نـاس الكلمة والوفا ناس التوحيـد ضحاو على جالنا هــانوا لعمــار
عْـزاز على التاريخ خلدهم تخليـد مذكوره خصلاتهم مــن دار لـدار
سال عليهـم سال شهيد بشهيـد بجاه المولى عيــد عنهم طرف اخبار
قلهم راني كنت في صحره وحيـد نتلاوح مـابين نكار وجــــزّار
عرب انبطحوا للعدو مدّولو ييـد لا مـن جــابو نيف عني و لاّ غار
الخونه نصبــونا فرعـون جديد استحيا نساءنـا في عـز انـهـار
قوم قسات قلوبهـا ولاّت احديـد صم بكم طافيــة فيهــم لبصار
خبرّهم رانــا ابقينـا للتمرميـد للهانة .. .للذل .. مـا عدناش احرار
الشعب مهوّل مالـقى غير التنديد و أولي أمـرو سايره عكس التيـار
الأشراف تعدهم عْلى اصباع الييد و البقيه اتصب ف الزيت عْلى الـنار
قلت لهم كي ساومـوني واش تريد موت العزة خَيْـرلي م قْصور العار
مهما عشت من العمر قدّاه انزيد و مهما طول ذ العمر عني يقصـار
إما يهنى ذ الوطـن إمـاشهيـد هذي هي كلمتي و آخر قـــرار
امضاو على شْهادتو في صبحة عيد زفـوها نعْت العروســه بالنـوّار
مبروك اشْهاده و مبروك التخليـد فــي جنه من تحتها تجري الانهـار
سافر يـازعيـم للعيش الرغيـد حبّـك ربـي ركبك مع لبــرار
عيـد عليهم عيـد يا عبد المجيد دم المسلـم راه بالكثـره شـرشار
و المقصود اهنـا العربي بالتحديد ثرواتو كامــــله تحت الحصار
أغبياء و قلوبهـم مليانه كيــد متفقين ايهـدمونــا جار بجـار
الجاهل شقي و فـي ظنّو سعيد و العارف وسـط النعم شاقي محتار
غصن النخله يبان شامخ من بعيد طبع النخلـه ف اسما تعـلى تخضار
الحره عرجـونها كل عام يْزيد أما العــرّه لونهـا ديـما مصفار
لا كرامه بْقات في هـاذ العبيد يتباعو نعـت البهايـم بـالدولار
ساس الرمله يامصقف بالقرميـد يرشى حيطك مايطـوّلش وينهـار
يـا خويا تنديدنا ما عاد يفيـد نتحـدو و انجـدّو عهــد الثـوار
ميّت ميّت موت واقف يا صنديد عَلّي صوتك ف السما يعلى بجــهار
الخاشي يخـشى مـن الله الوعيد و للي كيفو كيفنا ما كــان اعبـار
أرحم ياربـي الشهيـد الفقيد فـي علّيين تسكنو و النابي جـــار
و بالصلاة عْلى النبي نختم لقْصيد محمـد رسول اللـه شـارق لنـوار
جانفي 2007
من أضعف الايمان
وَاش تهجِي في ناس تَسْبَحْ فالظَّلْمَه واش تهجِي في قوم هَاجيْه القرآنْ
ما نضربش احنَا الجَّاهِل بالقَرمَه و مَا نضربشْ احْنَا الفَارِغ بِالمِلَيانْ
قلِّي واش يَسْوَى العَبْد بلا حشمَه نقلك واش يَسْوَى العَبْد بلا ايمَانْ ؟
ظَنِّي جُثَّه هايْمَه والقلـبْ أعمَى ظَنِّي جُثَه قَاصدَه دَار الخُسْـرَانْ
هذا النَّوع انفضَّل عليه ابْهِيـمَه لبهيمَه و اتخَاف من عظيم الشَّانْ
قـَوم الجِّن و آمنت منُّو أمَّـه و اتسَبَّحْ حتَّى الشّجره و الحَيْوَانْ
لكن لاَ بُـدَّ علِـينَا من كَلْمَه نَمْدَحْ فيهَا حبِيبْ سَاكِن فِي لَكْنَانْ
نُوقف صَف أفريد ضِّد العَولَمَه نُوقف وَقفة حَقْ فِي وجْه العِدْيَانْ
السُّكوت على البَاطِل جَريـمَه و السَّاكت عَلْ لحَق يتسمى شيطَانْ
ما نُسْكتشِي ما يظنـُّونَا لُقْمَه مَا نتفتَّت ما نْجِي بيـن النِّيـبَانْ
ياك احنـايا دينا دين الرحمه خيرة خلق الله بلسـان القـُرآنْ
رَسَايلْهُم ڤـَاع لينَا مفهُومَه و ما تَسْعَاش خلاصْ نَار بلا دُخَانْ
كم هديه جات منهم مسمومه وما تَخفَى عنَّا خْصال بَنِي عِريـَانْ
غَـيْ مُؤامرَات عنَّا مَزعُومَه ما نَامِنْشِي بالقسَاوسْ و الرُّهـبَانْ
أهـْل الغَتبَه و الرِّبا و النَّميمَه أهْل البدعـَه و الظَّلالَه و البُهتـَانْ
مَهْمَا ذَاعُومن خْبر ولَّ رسْمَه خبر الفاسق مَا نْديرُو فِي الحُسْـبَانْ
المُسـْلِم ديمَا طريـقُو مَلغُومه قِوَى الشَّر امحَوْطَه مِن رَبـْع أركَانْ
احنا ما نخشَاشْ لاَيم في لََومَه حَتـَّى المَّوت نْقَابْلُـوهَا بالأحْضَانْ
بسلاَحْ الثَّبَات ولسَان الحكْمَه نتماسك و انشد فـي حبْل الايمَانْ
علَّمنَا سيـدي احمد بوفطيمَه انْكُونُـو رَمْـز المَحَبَّه و الإحسَانْ
بَعْثُو رَبِّي خَالقِـي لينَا رَحمَة و ابْقَى سِيرَه صَالِحَه فِي كُل ازمَانْ
امْشَبَّع بعْلُوم وخْصَايل عُظْمَى لاَ ينْطَقْ بهوَاه كُلش بِالبُرْهَــانْ
خرجْـنَا للنُّور كنَّا في ظَلْمَة قَمْر انْ شَعْشَعْ عَمْ نُورُو كُل امْكَانْ
قَبْلُو كَانْ الكَّونْ غَاطِسْ فِي غمه كَانتْ خَلقْ الله تعبدْ فِي الأوثـَانْ
حَبُّو ربـِّي طَلـْعُو فَوق القِمَّه شَافْ للي مَا شَافْـهَا قبْلـُو إنْسَانْ
يـَوم نْ صَلىَّ مَعَ الأنْبِِيَاء لمّه سَخـَّر ليه جنود تخـدم والحيوانْ
يَوم نْ أُعْرِج بِيهْ في سَابِعْ سمـَا فِي كُل وَحْده شَاف واحِد مِن لخْوَانْ
الصَّلاة عْلَى النَّبِي فِيـهَا نَغْمَه آمر بيها خَالقـي عَظِيم الشـَّـانْ
حِينْ تْصَلِّي علِيهْ تَوصْلـُو ثَمَّه كُلْ خمِيسْ يشُوفْ عَمْلك يَا فـُلانْ
واحنـَا بالغيـَاب دارنَّا قيمَه اتشَــوَّق وبْكَى علينَا يا لخـْوانْ
قالَلْهُم اتجَـي مِن بَعْدي أمَّه تأمَن بيَّا دُون مَا شافـتْ لعْـيَانْ
حَتى حنَا فِي حياتْنَا عايشْ دِيمَا نردَّدْهـَـا و انزِيدْ نجْهَـر بالآذانْ
جْوَامِعْ فِي كُل بَلـْدَه مَقيُومَه صْوَامِعْ تَلمَع كِي اللُؤلـُؤ والمرجَانْ
الإسْلاَم دواء النَّفسْ المَهْمُومَه و الإسْلام دَواء السَّاقم و الغَضْبَانْ
قَدْرُو عالي فِالسْمَا ضَوالنِّجْمَة نُورُو سَاطِع ذَاع صِيتُو كُل امْكَانْ
الملـيَار و نُـص عنـُّو مَلمـُومَه مَا ظنِّيـت خْلاَص ذ الغَالـِي يتْهَانْ
سَوَاسـِيَّة ڤَاع ب نفْسْ السَّومَه لاَ فَرق مَا بَين مَحْكـُوم وسُلـْطَانْْ
رَاه صرَالُو كِي النَّبْتـَة جَنْب المَاء كُل دقيـْقَة زايْدَة تَعْلى و تبـَـانْ
مَا خَلاَّش خْلاص فِيئة مَظلومَه حَرَّرْ خَلق الله مِن ظـُلْم و طُغـْيَانْ
نحمد ربِّي خَالقِي عَن ذا النِّعمَه والصَلاَة علَى احْـمَد طـهَ العَدنَانْ
شَفيـعُ العُصـَاة يَوم القِّيامـَه الاِسْم المكتـُوب ف الجـَنَّة عِنْوَانْ
يـَومَ لا تنفـَع فِيـْه النَّدَامـَه صَهْد النـَّار ايذوَّب جْلـُود العِمْيَانْ
رُدْ عليهم نعْمتِك ربـِّي نقْمَه نتوسْلك يَا عزِيـْز و يَا رَحْمَــانْ
و للِّي سَاندهُم و للِّي كي هُوما مُول الرَّسْـمَة سَكَّــرْ عليه البِيبَانْ
و للِّي سَاهم ڤَََََََاع فِي هَاذ الغُمَّه ارْمِي بِيهم فِي المهَالِـكْ والطُوفـَانْ
سُبْحَانك مَنْ دِرْت أمْرِك في كَلْمَه كَلمة كُنْ يَكُون كامل كيمَا كـانْ
عَلىَ خُطَى الحَبِيبْ سِيرِي يَا أُمـّه علىَ خُطَى الحَبيب نُوصَل فِي لامَانْ
مَهْمَا قُلت عَلَى حَبِيبي مِن كَلمَه رَانِي رَانِي حَاسْ دايِم بالنُقصَـانْ
نشْكُركُل للِّي وقَفْ فِي ذا الأزْمَه شَعْب و حُكُومات فِي كُل البُلْدَانْ
فيفري 2006
