القصائد الذاتية
عتاب
لوبيدى نكويك يـا قلبي كيـات نقيم عليك الحد بمياتن جلـــده
و مانحبس حتّان تحبس ف دقـات وكي تحبس انكمل عليك العــده
تسهلي و نلوح جـدك في جمرات و نخليك تطيب غي وحده وحـده
على خاطر ديما تعيد الذكـريات و اتنبش فى جراح يبست من مـده
تحكيلي ع للي عشقنا وقت انفات ومعاها ذقت الهموم بلا عـــده
هاذيك للي خطفتك مني ومشـات وتركتلي كل الجواجي مصهــده
كنت تسافر فى هواها بالسـاعات و اتخلينـي كى الجثه متمـــده
و كاين في بعض الليالي كنت تبات و انا ساهر فوق مطرح و مخــده
طاوعتك وبكيت ب انواع البكيات مره نجهر بالبكا مره جحـــده
دمعة حب ماهيش كي كل الدمعات دمع الحب يفيض من جوف الكبده
لو يصب على احجر يصير افـتات تتحرتت منو اجبال المترفـــده
يتسمى بركان من غير سحــابات تذوب الصمه و الحديده تتصـدى
يعذرني من ذاق من كاس الآهـات و اتخلات احباب عنّو في شــده
في ظهرو مدقوق كذا من طعنات كي عيّط ما صاب واحد للنجــده
يا قلبي لا تزيد هم عْلى للي فـات طاوعتك و اصبرت عن رايك مـده
ماكش عبد نخاصمك عند القـضاة تحكم حدّك ما اتزيدش تتعــدى
ترجيتك تمحي معايا ذ الصفـحات انقطـع و انت ترقــع بالنفـده
و اتشعل في نار بعدن قلت طفات و اتفكـر فيا الهم للي عــدّى
ياحسراه عْلى ايام الحب افــنات كان الحب منين كانتلو عهــده
فاتو عنا اسنين كي حال منامات راحت ما ولاّت هاذيك القعـده
اعزفنا للحب لحن و اغنيـــات و اكتبنا في خاطرو كم اقصيـده
ظنيناه يدوم ما دامت لوقــات ما شكينـا في ا ّيامــو محدوده
الأحلام للى ابنيناها هِــوات و للى ظنينـا اذهب ولّ خــرده
اجنينا غير المحاين و التنهـــات احصدنا شوك للي ازرعـناها ورده
اسقيناها مسـك المحبه و اتعـلات عادت نخله ب لعــراجن مرفوده
و لما خابت شوف ليها كي ولاّت قعدت خشبه واقفه في مهمـوده
واش انواسو بالنخل بلا تمـرات يا قلبــي هكذاك ناس بلا عهده
لا تتغر بزين دنّق للخصــلات ويذا تصحب خير رجـال الجوده
يا قلبي لا تخون من حبّك هيهات و ماتقطعش معاه حبــل المـوده
و للى كرهك بعدو و انسى ما فات العبد الرادى قلّب عليه الفــرده
ضارى كاسح ف لبلا عندك ندهات دير يا قلبي ديرلي كانش هـدّه
هاذيك للي جفات عنك ما سقسات اكويها كيمـا كواتك ف لكبـده
و اششفى كيما العديان اشـشفات ها ساعفنى وكونلك مولى مبــدا
هاذا حال الحال و الـدنيا دالات و مهما طال اتجى الفرقه لا بــدّ
تاخذ رايي بدّل عليك الشوفـات ريحني و ارتاح يا قلبـي و اهـدا
يهمسلي و يقول غي هي بالذات و الله غالب جات في شـاو المبـدا
سكنتلى لعروق و مْع الدم امشات و ما نقبل من غيرها حتى وحــده
كبرت بين سنين عمري و تربّات اموالفها كيما اموالـــف ذ البلده
ما طقتش ، خلاّت فيا بصمات كيما الوشم للي مموّر ف الــزنده
يا معاتبني كف عني من التهمات عندي مبدا عَلْ امحبّة ما نـــردى
ما يفرق بيناتنا غير الممــات و مانتهنى غير في ذيك الرقــــده
جانفى2008
أطلال
هاذ المضرب كان محبوبي يعـنيـه كنت نـطل عليه من راس الـكديه
كان اصعيب الحـال باه انقرب ليه و للي يـقــرا تنفعو غي لبريه
بكري كان الحب ع النـاس نخبيه من الحشمه و الخوف نتلاقى خفيه
حين تجيني اتريّـح القلب تزهيـه نحس الدنيا كامله هاذي ليــا
زهو الصغر إيهيج بنادم يعميـه و ايخـلي كل الجـوارح مقديه
كان غزالي كنت متولع غي بيه من غيرو موحال حاجة مقضيـه
اذا يلقى كي النسمه نهـدف ليه ويذا نلقـى يكّسـر الباب عليا
باقي حبو حي في قلبي خـافيه مثل الوشمه ف اللحم تبقى حيه
سهم الحب لي ارمـاني بين ايديه ما نويتو مكتـــوب ماهو بيديا
مفارق حبو لازمو عبد يعزيـه و يصبرلو خـاطرو ع لوخـيه
نار الحب اتهدم القلب و تكـويه و يذا شعلت مـا تخليشي حيّـه
اتحس العـاشق رايبه كيفان عليه حامل ثقل كبير و امحان اقويــه
نعت للي مسجون عسكر داير بيه امسلح بسيّوف من كل ثنيــه
ترضالي جنحين نغـدى طاير ليه و نفرفر و انحط عند للـي بيـا
علاه هجرت لاه قلبك قسيتيه واه نسيت امنيـن كنــا ذريـه
ولّ حجره ما قدرت نفتت فيه واش انحرتت ف لحجار الصميـه
هان عليك العيد لسمـر هبلتيه خلّى الطُّبه عـاجزة و اهل الرقيه
زدت جرح على جراحو جرّحتيه كشفك ربي بين صبحه و اعشيـه
بن عرشك يا جايحة فرطت فيه و اقعدت سهم الوحوش البريــه
تبّعت لفلـوس و الحب انكرتيه قليل الأصل امحبتو هـاذي هـيا
خليتيني وّْحيـد قلبي يتّمـتيه و الله ماني امسامحـك يا موذيـه
كنت هاني رحت للذيب نربيه كي آمنتو كشّر النــاب عليا
نبش لحمي و العظم يكدد فيـه نستاهل كي درت ف الذّيب النيه
خلاني غ طير مكسوره جنحيـه طايح تحت احجار في جنب لْوطيه
الصيد للي جاه يحكمو يـدّيـه استسلم و عاد لا يسـوى شيَا
حْليل العاشق ما يكون اللوم عليه ياسر مثلي مـن خْـلايق مبليه
راني داخل بـير نارو حاطت بيه صهدو يضرب كالريح الغربيـه
ريح شْهيلي جاي غبارو كاسـيه فيه الرمله و فـيه قـداه نْ حـيه
للي صابو يْروح من برو ينفـيه يقعد هيكل في صحـاري منسيه
ذا الحب للي صابني ما ليه شبـيه حطـم قصر نْ كان قلعة مبنيـه
حرّم أكلي عدت للنوم امعاديـه عدت نْعد اضْلوع باصباع ايديا
ولفي واعر باه من ذاتي نمحـيه يا لحبـاب خيــالها في عينيا
وللي داخل ذ البحر قلت نوّصيه يحذر بالو مـن احوايـج مخفيه
العبد الغافل راه في رمشة يدّيه ما يرحمش الطايره و البـــرّيه
نتفكر ساعات ذالمضرب و نجيه و نترحم على اسعيد و حيزيــه
رنـة بن قيطون للعاشق تنــزيه خـلّد قصه واقعة قعدت حيـه
راح الحب و راحت مـعاه امّالـيه ماهو باقي شي يعجب ف الدنيا
غاشي بكري كان يعرف لمعـانيه غاشي بكري كي لمعـادن ذهبيه
كان إذا عاهـدك عهد يوفيـه أهل النيه و الوفـا و الحنيــه
ناسـو تحشم و النيف تْموت عليه لَبْسَه عربي و اللْحَف طيه طيـه
تتحيك نسـوان و الوجـه اتغطيه اتزيد زماله فـوق هاذيك و ذيا
أمـا حب اليوم العاقل يحشم بيه حب الدراهم ما يْصَلح قَضيـه
ناسو عشقت ف دّينار و ركعت ليه راس المال الكذب و الخدعانيـه
بعض الجيل اتخلطت لعيوب عليه و انسى أصـلو قـلّد النصرانيه
ألطف بينا يا الله ذ الجـيل اهديه و استرنا يا خالقي من ذ الحيـه
نختم قولي بالصـــلاة على نبيـه صلّوا يا حُضَّار عن سيـد الوَليه
عين الحجل في: 20/06/2005
عديان الحب
نشتي نخرج من لمدينه نتجول نتأمـل ف للي اخلقهـا مولايا
تلقاني بعض اسْوايع متهول كي نسمع و انشوف بعض القضايا
نتخيل نلقى حميـده متكسل و الدمعـات على اخدودو جرايا وانقلو و علاه تبكي يا راجل عيـد عليا قصتك م لْبدايـــه
ما دريتش بين عرشي نتبهدل كلمه منهم ضاع تعبي و اشقايـا خربولي في حيط حبي واتهلهل واش جاب للي ايهدمو للبنايـه
اهجيهملي ابجاه ربي لا تبخل فرقو بيني و بين حبي و اهنايـا
إلّي جاني قال فرحك راه ابطل خلطني هـول الخبر في بعضـايا وبْدالي غي بلعقل جسمي يثقل انحس امدافع فوق راسي دوايـه الريح امهول و المطر عني ينزل ثمه شفت الليل دوني و حذايـا
افراق حْبيبي كيتـو لا تتحمل قبل لاّ نبداو جات النهايـه هاني نبكي على حبيبي راح ارحل وهاذ الناس على ادراهم بكايا
اداها مول اشـكاره كي عول و الطماعة شاركو ف الجنايه
نبكي بكي ايتيم عن حبي لول هزوها قدام عيني مقـوايـا
البارود يقـول و احريم تولول و نا ناري في عْضايـا قدّايه
الحب الاول سال عليه نّاس الكل لا طبيب يفيد و لا رقايـه
لا يتبدل عسل النحل و لا يتمل مهما طوّل يقصدوه الشرايه
راني كـللّي امجيفينو و امكبـل نتنهت مجروح من كيد اعدايا
أكثر مللّـي راه ف الغابه يزطل وللي قال اندير راسي في رّايه
مقواني في عرسها نلبس لكحل و اندير الحداد نكري عزايـا
ذيك للي والفتها من كنت اطفل وكي نمشي خيالها طول امعايا
عاشت سنـوات عـني تدلل نتجول كيما الطيوره الغنايه
نعت الصبية نقابلو ف العيد يْهل نتبـاهى نتبادلو ف الهـدايـا
نستنى في فرحنا مـابا يكـمل قتلوه العديان ف النص انكايـا
قلت انا بلاك ذ العـام انسهل طعنوني عديـان حبي مورايا
ماني من لْغاشي للي يظل ايحلل عمري ما هزيـت للذل الرايه
نا ذنبي الوحيد زوالي و افحل ما فيديش المال لكتـاف اعرايا
مـاني لا تجــار و لا مقاول نخلص ثلثميه و صابر لَقْضايـا
ايعيط مول الحوش تلقاني راحل عندنا عشريـن سنه كرايـا
زوج اديار ونرقدو طفله وطفل ملفاتي ارشات في ذ الولايه
انلف ميزي مالقيتش واش نعمل لمعيشة ولات ماهيش اقرايـا
الحب الاول كي العبد المتاصل صادق وعدو موش مولى دعايه
نتشوق و انجي نموج على لمحل نسترجع قداه قصه واحكايـه
تتهوض لجراح ثمه كي نوصل يبدالي شوق المحبـه يتحايـا
يا عشاق انحس لارض تزلزل ولّ شّوك انبت في وسط عضايا
رحت نسقسي فالمراسم وانسول نلقاها خلات ف الاهل وْصايه
قالو قالت خـايفتو لا يهبـل راه القلب امعاه و الجسم اهنايا
كي نسمع لعراس نيراني تشعل اتمنيت يكـون هو و انايــا
يْعسـو فيها خايفين لّا تهمل و اتهترف قالو اتعيط بسمايـا
وينك يا محبوب قلبي عني طل وكري مايحلاش من دون انتايا
راني شاهي كاش ليلة نسلـل نخطفها و انروح نحكم لوطايا
اذا مت انموت للحب امسبـل قول لعيسى يديـرها في روايه
ما بقالي غير من وكري نرحل لعلاني نصيب ف لهجر ادوايا
ما نقعد في برها ما نتخلخـل و انولي مهبول قـدام اعدايا
راني نسبح طول ليلي و انرتل نتوسل لله يقبل دوعـايـا
يعيشو طول حياتهم ديما فالذل بركة العشاق و للي صلايه
ما طقناش على ذيابـة تتختـل جمله سمسارين ف لحْب اشفايا
اهجيهملي بجاه ربي لا تبخـل حدّو بيني و بين فخري و اشنايا
اتمهل يا سـي احميدة لاتجـهل و اتفكر واش قال ربي ف الآيه
فضلنا و اعـطى لبونادم لعقل و من المحبه كرمو بالهـدايـه باذن المـولى كل مشكله تتحل تتهنى و اتعود في عيشك غايه انتشر ذا الضـر فينا و استفحل عدنا قاع على الدراهم بكايا
لمسيلي من جاب ذا القول وفصّل كاين ياسركي حميـده ضحايا
20 ديسمبر2008 